Veðmálafyrirtæki í Malasíu hafa hætt að bjóða upp á tölur sem hafa skírskotun til hraps flugvélarinnar MH17 yfir Úkraínu á fimmtudaginn.
Tölur á borð við 17, 1717 og 777 seldust upp er áhugasamir þyrptust á sölustaði og völdu sér númer í geysivinsælum lottóum á borð við Toto og 4D.
Algengt er í Malasíu að fólk velji númer sem tengjast slysum á einhvern hátt og eru skráningarnúmer farartækja sérstaklega vinsæl. Flugvél Malaysia Airlines hafði sérstaklega margar vísanir í töluna 7 en sem fyrr segir var hún númer 17 og af gerðinni Boeing 777. Hún flaug sitt fyrsta flug árið 1997 og var því 17 ára gömul. Ekki bætir úr skák að hún fórst á sautjánda degi sjöunda mánaðar ársins.
Berayja Sports Toto-lottóið dregur úr vinninga alla miðvikudaga, laugardaga og sunnudaga. Talan 4176 vann stærsta vinninginn síðastliðinn föstudag.
