Hlynur Bæringsson, fyrirliði íslenska körfuboltalandsliðsins, er vongóður um að geta spilað á móti Bosníu á miðvikudagskvöldið en hann snéri sig illa á ökkla í sigrinum á Bretum í London.
„Staðan er betri og ég hef verið í meðferð frá því að ég kom heim. En ég er ekki brotinn sem var mikill léttir. Það er enn sársauki í fætinum en fer minnkandi. Ég stefni á að reyna að spila, minnka bólguna jafnt og þétt fram að leik og reyna svo á þetta,“ sagði Hlynur við Fréttablaðið í gær.
„Við vonum innilega að hann geti aðstoðað okkur á miðvikudaginn. Þeir koma ekki mikið harðari þannig að við erum nokkuð bjartsýnir. Eigum við ekki að segja að það séu helmingslíkur,“ sagði Arnar Guðjónsson, aðstoðarþjálfari og bætti við:
„Meiðslin eru talsvert betri en við reiknuðum með því við vorum alveg vissi um að hann yrði ekkert með okkur," sagði Arnar.
Hlynur er gríðarlega mikilvægur fyrir íslenska liðið en hann er sá leikmaður sem hefur tekið flest fráköst að meðaltali í leik í keppninni til þessa.
Tottenham
Nott Forest
