Hilmir Snær og Zlatko í blóðsleik á setti

Leikkonan Ágústa Eva Erlendsdóttir leikur eitt af aðalhlutverkunum í Borgríki 2: Blóð hraustra manna sem frumsýnd er í dag. 

Hún er í viðtali á vefsíðunni Lappari og ljóstrar upp skemmtilegu atviki sem átti sér stað á tökustað myndarinnar. 

„Þið verðið að vita að Zlatko og Hilmir fóru í blóð-sleik,“ segir Ágústa og vísar í meðleikara sína, Zlatko Krickic og Hilmi Snæ Guðnason.

„Þeir voru í blóðbaði í senu sem var verið að skjóta við rætur Esjunar þegar mikil snjóhríð skall á og það um mitt sumar, maður sá ekki símann sinn nema að halda honum alveg upp við gagnaugað. Nema hvað! Þá ákvað Hilmir allt í einu að fara úr buxunum til að koma leikstjóranum á óvart þegar storminn lægði en það vildi þannig til að hann var með bundið fyrir augun, afþví að hann var gísl auðvitað í senunni. Hann fikraði sig inn í húsið sem búið var að byggja við hliðina á útitökunum, sem var einmitt verið að taka upp ástarsenu milli 3 aðila sem Zlatko tók þátt í,“ segir Ágústa Eva.

Annar leikari myndarinnar, Sigurður Sigurjónsson tók þátt í gríninu.

„Í miðri töku sér Siggi Sigurjóns hvað er að gerast, sér Hilmi skakklappast inn í tökuverið, buxnalausann með bundið fyrir augun og leiðir hann í aðstæðurnar sem verið er að filma, settið er myrkvað og allir í ástarsenunni eru auðvitað með lokuð augun, því þau eru að kela auðvitað. Þetta endar þannig að Zlatko grípur þéttingsfast um mittið á Hilmi og sleikir á honum munninn, þeir falla niður í hamagangnum og á stoðir sem halda uppi fati af blóði sem átti að nota daginn áður en gleymdist, fatan skellist yfir þá og þeir liggja þarna í blóðsleik. Svo sættust þeir yfir sígerettu í rigningunni þegar Hilmir var búinn að klæða sig. Zlatko hrissti svo hausinn yfir íslenskri kvikmyndagerð og sagði þetta aldrei hafa getað gerst í hollywood.“