Skora á samninganefnd ríkisins að ganga nú þegar til samninga

Landssamtökin Þroskahjálp skora á samninganefnd ríkisins að ganga nú þegar til samninga við Félag framhaldsskólakennara en samtökin hafa sent áskorun til Illuga Gunnarsson, menntamálaráðherra, og Bjarna Benediktsson, fjármálaráðherra.

Landssamtökin Þroskahjálp lýsa yfir verulegum áhyggjum af framhaldsskólanemendum með fötlun og afdrifum þeirra í yfirstandandi verkfalli framhaldsskólakennara.

Um sé að ræða nemendahóp sem vegna fötlunar sinnar þolir oft illa allar  breytingar frá hefðbundnu lífi.

Samtökin telja að það þurfi að koma í veg fyrir þann alvarlega skaða sem verkfallið gæti haft á þessa einstaklinga.