Hætt við að selja meydóminn sinn á netinu þrátt fyrir 90 milljóna króna tilboð

Bandaríski læknaneminn sem hugðist selja meydóm sinn á netinu hefur hætt við, þrátt fyrir mörg tilboð.

Konan, sem heitir Hanna Kern, stofnaði vefsíðu undir nafninu Elizabeth Raine og tók á móti tilboðum í meydóm sinn. Kern segist hafa verið komin með tilboð upp á rúmlega nítíu milljónir króna þegar hún ákvað að hætta við.

„Eftir að hafa reynt þetta af fullri alvöru hef ég komist að því að þetta var aldrei góð hugmynd,“ segir Kern og heldur áfram: „Ég skil vel af hverju öðrum konum hefur mistekist þetta.“

Kern ætlar að einbeita sér að læknanáminu sínu en tók fram í yfirlýsingu að hún væri með mjög sterkar skoðanir á vændi og rétti konunnar til þess að selja líkama sinn.

Breska blaðið Daily Mail greindi frá því að Kern hefði fengið fá tilboð í meydóminn, miklu færri en hún hafði vonað.

Fyrirtækið Unique Media PR, sem sá um kynningu á uppboðinu, fer líklega fram á einhverskonar bætur vegna þess að Kern hætti við. Samningurinn á milli Kern og fyrirtækisins fól í sér að ákveðin prósenta af hæsta boðinu í meydóm Kern færi til fyrirtækisins.

Í fyrstu huldi Kern andlit sitt af hræðslu við að vera rekin úr skólanum sem hún nemur við. En í síðasta mánuði ákvað hún að stíga fram, eftir að einhverjir höfðu efast um að henni væri alvara með uppboðið. 

Kern segist hafa BA-gráðu í bæði verkfræði og líffræði. Á vefsíðu hennar kemur fram að hún sé 178 sentímetrar á hæð og vegi 59 kíló.

Missti móður sína tíu ára

Hin bandaríska Kern fluttist með foreldrum sínum til Sádí Arabíu, þegar hún var ung að aldri. Faðir hennar starfaði í olíugeiranum þar í landi. Hún segist halda uppboðið til þess að græða peninga fyrst og fremst, en nefnir einnig að henni þyki þetta vera ævintýri. Hún segist einnig ánægð að geta haft áhrif á gildismat fólks og finnst eftirsóknarvert að storka við venjum og hefðum.

Hún hefur verið spurð af hverju hún sé enn hrein mey, tuttugu og sjö ára gömul. „Ég hef alltaf haft mikið að gera. Ég hef aldrei fundið þann rétta og strákar hafa aldrei verið í forgangi í mínu lífi. 

Kern segist ekki útiloka að eittvað meira en bara kynlíf komi út úr uppboðinu. „Ég útiloka ekki að ég finni ástina. En samt finnst mér það afar ólíklegt.“