Það kemur helst á óvænt að nokkrir leikarar og leikkonur sem áttu stórleik á síðasta ári fengu ekki tilnefningar. Þar ber helst að nefna Opruh Winfrey í The Butler, Robert Redford í All Is Lost, Emmu Thompson í Saving Mr. Banks, Tom Hanks og Paul Greengrass í Captain Phillips, Scarlett Johansson fyrir Her, og James Gandolfini heitinn í Enough Said.
Barkhad Abdi er tilnefndur sem besti leikari í aukahlutverki fyrir Captain Phillips og Lupita Nyong‘o sem besta leikkona í aukahlutverki fyrir 12 Years a Slave. Þau voru bæði tilnefnd til Golden Globe-verðlaunanna fyrir leik sinn og eru klárlega stjörnur sem vert er að fylgjast með á næstunni.
Barkhad leikur sómalískan sjóræningja í Captain Phillips og fékk hlutverkið eftir að hafa sótt áheyrnarprufur fyrir myndina. Áður hafði hann fengist við að skjóta tónlistarmyndbönd og aðeins fiktað við leikstjórn í Minnesota þar sem hann býr en helstu tekjur sínar fékk hann þó fyrir að keyra limmósínu.
Saga hans í Hollywood hefur verið ævintýri líkust og var hann einnig tilnefndur til SAG-verðlaunanna fyrir frammistöðu sína sem sjóræninginn frá Sómalíu. Hann hefur nú ráðið sér umboðsmann í Hollywood og leitar að nýjum, spennandi hlutverkum í kvikmyndabransanum.

Lupita vann sem aðstoðarmaður í myndinni The Constant Gardener með Ralph Fiennes og Rachel Weisz og var hluti af tökuliðinu í tvo mánuði. Á tökustað fékk hún ráð frá Ralph sem sagði henni að hún ætti bara að verða leikkona ef hún gæti ekki lifað án þess.
Leikstjórinn Steve McQueen fékk þúsund konur í prufur fyrir hlutverkið sem Lupita fékk í 12 Years a Slave. Lupita landaði hlutverkinu, sem er hennar fyrsta, þegar hún var nýútskrifuð af leiklistarbrautinni í Yale-háskóla. Næsta verkefni hennar er hasarmyndin Non-Stop með Liam Neeson og Julianne Moore sem verður frumsýnd 28. febrúar.