Engill með ástarboga

Rithöfundurinn, söng- og leikkonan Bergljót Arnalds bakaði sjóræningjaköku fyrir fimm ára afmæli dóttur sinnar í dag. Hún segist vera kúrari með ævintýrahjarta og ætlar aldrei aftur að reyna að gefa súkkulaði upp á bátinn.



Hvað er það sem þú gerir alltaf um helgar?

Að vera á meðan er; vaxa, dafna og njóta.

Hvað ætlar þú að gera sérstakt um þessa helgi?

Dóttir mín verður fimm ára í dag og því ætla ég að halda heljarinnar veislu með sjóræningjaköku, vinum og vandamönnum. Það er búin að vera mikil tilhlökkun í heilt ár svo þetta verður afar skemmtilegt.

Hvar finnst þér best að vera um helgar?

Úti í náttúrunni eða með þeim sem ég elska.

Vakirðu lengur um helgar?

Já, stundum dett ég í það að spila á píanóið eða grúska eitthvað fram eftir.

Ertu árrisul eða sefurðu út?

Það fer alveg eftir stemningunni og hvað er að gerast hverju sinni. Ég er bæði kúrari og með ævintýrahjarta.

Hver er draumamorgunverðurinn?

Nýir ávextir beint af trjánum og mátulega þroskuð ber.

Hvernig er dæmigert laugardagskvöld í þínu lífi?

Það er ekkert dæmigert. Hver dagur sem við lifum er einstakur. Síðasta laugardagskvöld söng ég á tónleikum í Danmörku og í kvöld ætla ég að kúra með stelpunni minni eftir brjálaðan afmælisdag og spjalla um gjafir, gleði og gesti.

Ertu með nammidag og hvert er uppáhaldssælgætið?

Allir dagar eru nammidagar í mínu lífi. Ég man eftir einum degi þar sem ég reyndi að hætta að borða súkkulaði og það verður ekki gert aftur nema að mikið liggi við.

Hvað maularðu í sjónvarpssófanum á kósíkvöldum?

Stundum popp, stundum kartöfluflögur og stundum súkkulaði.

Heldurðu hvíldardaginn heilagan?

Það er hvíld í svo mörgu og allir dagar eru heilagir.

Ferðu til kirkju á sunnudögum?

Ef þar er athöfn sem skiptir mig máli, eins og skírn.

Hvað verður með sunnudagskaffinu og með hverjum drekkur þú það?

Síðasta sunnudagskaffi var með Mette, danskri söngkonu sem hefur verið að berjast við krabbamein. Hún er yndisleg. Það er enn óráðið hver kemur í næsta sunnudagskaffi en eitt er víst að það verður til nóg af kökum.

Til hvers eru helgarfrí?

Frí og uppbrot eru nauðsynleg lífinu. Það er svo misjafnt hvað hentar fólki til að hlaða orkuna sína og fylla hjartað. Hjá mér er það ástin, náttúran og sköpun.

Hvað er helst að frétta?

Ég er nýlega farin að syngja opinberlega sem söngkona og hef verið að semja lög. Ég flutti lag eftir sjálfa mig við þakkarbæn álfkonunnar Taminu á Álfahátíðinni á síðustu sumarsólstöðum og annað lag, Hurricane, í Danmörku í vor. Um síðustu helgi frumflutti ég nýtt lag á Jótlandi um ástardrenginn Cupid og næst á dagskrá eru heimatónleikar á afmælinu mínu, 15. október. Mig langar að bjóða þeim sem hefðu gaman af því að hlusta á fáein lög eftir mig og stefnan er að fjármagna útgáfu í framtíðinni.

Af hverju lag um Cupid?

Af því hann er svo stríðinn með ástarörina sína. Hann á skilið að það sé samið lag um hann og prakkaraskapinn þegar hann leikur sér að því skjóta fólk í hjartastað með litla leikfanginu sínu.

Hvernig stóð á þessum tónleikum á Jótlandi?

Danska söngkonan Methe Danefeldt Clemmensen bauð mér að flytja lagið ásamt tangó sem ég samdi í nýjum tónleikasal hennar á sveitabúgarði á Jótlandi, ásamt söngvurum frá Noregi, Hollandi og Finnlandi. Það var troðið út úr dyrum í þessum litla sal og virkilega heitt.

Hvernig tilfinning var að frumflytja nýtt lag eftir sjálfa sig fjarri heimahögum og í troðfullum sal?

Það var fiðringur, skelfing og gleði; allt á sama tíma.

Hér fyrir neðan má sjá myndbönd með lagasmíðum Bergljótar Arnalds: