Crystals eftir OMAM í aðalhlutverki í stiklu fyrir nýjustu mynd Pixar

Lagið Crystals með hljómsveitinni Of Monsters and Men hljómar í stiklu fyrir myndina „The Good Dinosaur“ eða „Góða risaeðlan.“ Myndin er frá hinu vinsæla kvikmyndagerðafyrirtæki Disney Pixar sem hefur sent frá sér kvikmyndir á borð við Cars, WALL-E og Brave.

Stikluna má sjá hér að neðan.

Stiklan kom út í dag en myndarinnar er að vænta í kvikmyndahús í lok nóvember. „The Good Dinosaur“ er önnur mynd Pixar á árinu en myndin „Inside out“ kom út nú í sumar. Sú mynd hefur fengið afar góðar viðtökur og er til að mynda talin 98 prósent fersk á vefsíðunni Rotten tomatoes sem tekur saman kvikmyndagagnrýni víðsvegar af internetinu.

Afar sjaldgæft er að Pixar gefi út myndir með svo stuttu millibili en vaninn er að aðeins ein mynd komi frá kvikmyndaverinu á ári. Hins vegar gekk erfiðlega að klára „The Good Dinosaur“ og í miðju kafi þurfti að skipta um leikstjóra en Peter Sohn tók við af Bob Peterson.

Stiklan er að mestu leyti laus við samræður og minnir því á kvikmyndina WALL-E þar sem lítið var um tal fyrri hluta myndar. Myndin fjallar um risaeðluna Arlo og ungan dreng að nafni Spot. Þeir ferðast yfir fallegt landslag eins og sjá má í stiklunni hér að neðan. Tónlist hinnar íslensku hljómsveitar fær því að njóta sín í stiklunni en stjarna Of Monsters and Men skín sífellt skærar vestanhafs.

Óhætt er að álykta að tækifæri sem þetta komi til með að vekja ennfrekari athygli á hljómsveitinni enda er um stórt kvikmyndafyrirtæki að ræða sem hefur á undanförnum árum verið duglegt við að koma myndum sínum á framfæri. Lagið mun því hljóma í bíóhúsum um heim allan innan skamms.