Lennon með glæsimark í sigri FH

FH bar sigurorð af Fylki, 2-1, í seinni leik dagsins í A-deild Lengjubikarsins í fótbolta.

Ásgeir Örn Arnþórsson kom Fylki yfir á 51. mínútu en Atli Guðnason jafnaði metin af vítapunktinum 12 mínútum síðar.

Það var svo Steven Lennon sem skoraði sigurmark FH á 65. mínútu með glæsilegu skoti beint úr aukaspyrnu í stöng og inn.

Þetta var fyrsta tap Fylkis í Lengjubikarnum í ár en Árbæingar eru enn í toppsæti riðils 1 með 13 stig eftir sex leiki. FH-ingar koma þar á eftir með 12 stig eftir fimm leiki.