Ferðalag til Aserbaídsjan bíður FH-inga

FH þarf að fara til Aserbaídsjan ef liðið kemst áfram í aðra umferð forkeppni Evrópudeildar UEFA í kvöld.

FH mætir finnska liðinu SJK í síðari leik liðanna í fyrstu umferð í Kaplakrika klukkan 19.15 og verður leikurinn í beinni útsendingu á Stöð 2 Sport 2 HD og Stöð 2 Sport 3.

FH er með 1-0 forystu eftir sigur í Finnlandi í síðustu viku og á góðan möguleika á að fara áfram.

Hafnfirðingar þurfa þó að fara í langt ferðalag komist liðið áfram. FH myndi mæta Inter Baku frá Aserbaídsjan en aserska liðið komst í dag áfram eftir markalaust jafntefli gegn KF Laci frá Albaníu. Liðin skildu jöfn, 1-1, í fyrri leiknum og komst Inter Baku áfram á útivallarmarkareglunni.

Leik FH og SJK verður vitanlega einnig lýst í Boltavakt Vísis og Fréttablaðsins.