Hrútar tilnefndir til kvikmyndaverðlauna Evrópusambandsins

Hrútar, kvikmynd Gríms Hákonarsonar, er ein tíu mynda sem tilnefnd er til LUX kvikmyndaverðlaunanna í ár. Þetta er í fyrsta skipti sem íslensk kvikmynd er tilnefnd til verðlaunanna.

Tilkynnt var um tilnefndingar á hátíðinni Karlovy Vary í Tékkalndi í gær. Þrjár af myndunum tíu komast áfram í undanúrslit og verða sýndar á Feneyjahátíðinni auk þess að vera þýddar og textaðar á öll 24 opinber tungumál Evrópusambandsins og sýnd í öllum aðildarríkjum. Tilkynnt verður um sigurvegara í lok árs.

„Ég verð að viðurkenna að ég vissi ekki um þessi verðlaun fyrr en ég fékk sendar upplýsingar um að Hrútar væru tilnefndir og ég átta mig betur á því núna hvað er í húfi og hversu merkilegt þetta er,“ segir Grímar Jónsson, framleiðandi myndarinnar. „Það eru allir að óska okkur Grími til hamingju hérna úti og manni líður hálfpartinn eins og maður hafi verið að vinna eitthvað bara við það eitt að vera tilnefndur. Það væri magnað að komast áfram í þriggja mynda úrslit og það verður ljóst eftir tvær vikur.“

Tilnefningin er enn ein rósin í hnappagöt Hrúta en fyrr á árinu sigraði hún í flokknum Un Certain Regard á kvikmyndahátíðinni í Cannes í Frakklandi.