Gunnar Nelson sendir veikum nafna sínum áritaðan bol og baráttukveðju

Bardagakappinn Gunnar Nelson sendi ungum nafna sínum í Bandaríkjunum bréf og áritaðan bol. Gunnar James Keanealy er tæplega mánaðar gamall en hann hefur verið á spítala frá fæðingu.

Foreldrar drengsins, Stephanie Ann Keanealy og Bradley Keanealy Jr., ákváðu að rétt væri að nefna son sinn í höfuðið á Gunnari Nelson þar sem hann væri bardagamaður líkt og Íslendingurinn.

Sjá einnig: Hjón nefndu veikan son sinn í höfuðið á Gunnari Nelson

Fjölskyldan setti inn skeyti á vegg Gunnars þar sem þau sögðu frá nafninu. Gunnar svaraði þeim á Facebook og hefur nú bætt um betur með því að rita honum bréf og senda honum áritaðan Mjölnisbol.

„Til Gunnars litla. Láttu þér batna vinur. Bestu óskir frá Íslandi,“ ritar UFC-kappinn í bréfið.

„Kærar þakkir fyrir að senda okkur þetta alla leið frá Íslandi,“ skrifar Bradley. „Við erum þakklát fyrir sendinguna og hún hefur veitt okkur aukinn kraft. Guð blessi þig og þakka þér.“