Vogin: Allt á sér ástæðu

Elsku kjarkmikla Vog. Það er ekki hægt að segja að allt hafi farið nákvæmlega eins og þú ætlaðir þér. Þú ert búin að vera svolítið hissa á lífinu og þú þarft að vita það í hjarta þínu að þetta átti að gerast nákvæmlega svona.

Þú getur aldrei breytt öðrum en þú hefur aflið til að ráða hvernig þér líður í þeim aðstæðum sem koma upp á. Sýndu því fólki sem fer í pirrurnar á þér sérstaka þolinmæði. Andaðu djúpt og byrjaðu þetta haust með krafti.

Þér á eftir að finnast sem svo að þú hafir farið aftur á byrjunarreit með svo ótal margt enda gæti ég skírt þetta haust hjá þér „Back to basics“. Ef þú ert búin að vera með einhverja verki í beinum eða höfði eða hefur bara fundið fyrir almennri leti muntu finna leið út úr þessu ástandi. Og mundu það að skipulag rekur stress í burtu.

Langtímasamband er það sem hentar þér, elsku Vogin mín, svo stress og streita og sífelldar skiptingar í ástarmálum passa þér bara alls ekki. Það er ekki tímabært að neinn fái rauða spjaldið.

Þú munt ekki missa trúna á sjálfa þig, það er aðalatriðið. Það er mjög mikilvægt að vera með alla samninga á hreinu annars lendir þú í rifrildi sem væri mjög vel hægt að sleppa.

Mottó: Ég er búin að fara í gegnum það versta til að fanga það besta.

Frægir í Voginni: Glúmur Baldvinsson stjórnmálafræðingur, Hjalti flugþjónn, Ingi í Sign, Jón Axel Ólafsson athafnamaður, Matt Damon leikari, Íris Berg, fatahönnuðurinn minn, Mary Poppins, Steingrímur Sævarr Ólafsson fjölmiðlaráðgjafi, Svanhildur Hólm Valsdóttir, aðstoðarmaður ráðherra og sjónvarpskona, Hanna Birna Kristjánsdóttir þingkona, Hildur Sverrisdóttir varaborgarfulltrúi, Ragnhildur Gísladóttir tónlistarmaður, Solla Eiríks á Gló.