Sjöunda Stjörnustríðsmyndin fær glimrandi viðtökur eftir forsýninguna

Sjöunda Stjörnustríðsmyndin, Star Wars: The Force Awakens, var forsýnd í Bandaríkjunum í gærkvöldi og hefur fengið nokkuð jákvæð viðbrögð. Myndin var sýnd í þremur sölum í Hollywood & Highland-miðstöðinni sem stendur við Hollywood Boulevard og inniheldur meðal annars Dolby-höllina, sem áður hét Kodak-höllin, þar sem Óskarsverðlaunahátíðin fer fram. 

Eftir forsýninguna söfnuðust áhorfendur saman í stóru tjaldi fyrir utan miðstöðina þar sem þeir ræddu sín á milli um myndina en kvikmyndaver Disney hafði bannað opinberar umsagnir um myndina fram á miðvikudag. Fréttastofa AP tók þó púlsinn á nokkrum áhorfenda fyrir utan miðstöðina og voru margir afar ánægðir með myndina. Fögnuðu margir gamaldags nálgun leikstjórans J.J. Abrams á þessari sögu, sem reyndi hvað hann gat að forðast tölvubrellur við gerð myndarinnar.

„Mér fannst hún frábær og finnst J.J. hafa staðið sig vel. Mér fannst skemmtilegast að sjá samspilið á milli nýja leikarahópsins og þess gamla,“ sagði leikarinn Zach Braff við AP-fréttastofan. Í myndinni má sjá leikara úr fyrstu Stjörnustríðsmyndunum, þar á meðal Harrison Ford, Carrie Fisher og Mark Hamill sem snúa aftur sem Han Solo, Leia prinsessa og Logi Geimgengill, ásamt nýjum hetjum og skúrkum, sem Daisy Ridley, Oscar Isaac, John Boyega og Adam Driver leika. 

Gamanleikarinn Patton Oswald sagði við AP að myndin markaði endurkomu þess sem varð þess valdandi að hann féll fyrir Stjörnustríðsmyndunum sem krakki. „Hún var stórskemmtileg. Ég fékk sömu tilfinningu við að horfa á þessa og sem krakki.“

Myndin verður tekin í almennar sýningar á föstudag og er búist við því að hún muni slá nokkur aðsóknarmet en hún hefur nú þegar slegið met þegar kemur að forsölu á miðum.