Á vefsíðu Washington Post er sagt frá því að öflugir vindar séu algengir á Íslandi. Þessi stormur gæti þó orðið með þeim sterkustu og að heita loftið sem honum fylgi gæti hækkað hitastigið á Norðurpólnum um nokkrar gráður. Þá muni Bretar einnig finna vel fyrir óveðrinu.
Meteosat-10 infrared animation w/Atlantic low pressure system starting to rapidly intensify while moving quickly NE. pic.twitter.com/Ikg58wCSoO
— NWS OPC (@NWSOPC) December 28, 2015
Trausti Jónsson veðurfræðingur skrifaði á bloggsíðu sína í gær að Evrópumiðstöðin hefði „heldur betur bætt í lægðina miklu“ sem eigi að heimsækja okkur á aðfaranótt miðvikudags. Hún reikni miðjuþrýsting nú 931 hPa. Þá vilji bandaríska veðurstofan enn betur og segi 924 hPa, en að efri talan sé líklegri.
Sjá einnig: Fylgstu með storminum nálgast
„Það er sárasjaldan að þrýstingur fer niður fyrir 930 hPa hér við land. Fullsnemmt er þó að fara að smjatta á slíku – enn er meir en sólarhringur til stefnu og reikningar bregðast oft á styttri tíma. Við bíðum því aðeins með einhverjar greinargerðir um lágþrýsting,“ skrifar Trausti.
Veðurstofan varaði í dag við stormi víða á landinu, þar sem hún býst við roki eða ofsaveðri á landinu í kvöld, en að það lægi strax annað kvöld. Veðurspána má sjá hér fyrir neðan:
Suðaustlæg átt í dag 8-15 m/s. Þurrt norðan- og norðaustanlands, slydda eða rigning með köflum sunnantil, en annars dálítil él. Mjög djúp lægð nálgast landið í kvöld úr suðri með ört vaxandi austan átt og fer hún allhratt norður yfir land í nótt. Aðal vindstrengur þessarar lægðar er austan við lægðarmiðjuna og gera nýjustu spár ráð fyrir að vindstrengurinn nái inn á landið austanvert með sunnan roki og sums staðar fárviðri við austurströndina í nótt.
Mikilvægt er að fylgjast með veðurspám því ekki þarf braut lægðarinnar að breytast mikið til þess að miklar breytingar verði á veðurspám. Í kvöld og nótt má einnig búast við talsverðri úrkomu suðaustanlands og á Austfjörðum. Upp úr hádegi á morgun verður lægðin komin norður fyrir land og má þá búast við suðvestan átt 15-25 m/s með skúrum eða éljum um landið sunnan- og vestanvert, en hvassast verður þá á annesjum norðantil. Annað kvöld dregur síðan ört úr vindi.
Tues-Wed intense hurricane-force cyclone to track right over Iceland (930 mb) w/warm sector bombarding U.K. pic.twitter.com/DjHWvLzdd2
— Ryan Maue (@RyanMaue) December 28, 2015