Færum aftur á byrjunarreit

Ætlaði Ísland að sækja aftur um aðild að Evrópusambandinu, eftir að hafa formlega slitið viðræðum, þyrfti landið að hefja allt umsóknarferlið frá grunni, segir í svari Matthiasar Brinkmann, sendiherra ESB á Íslandi, við fyrirspurn Fréttablaðsins.

„Ferlið þyrfti að hefja á ný, ekki bara á Íslandi heldur líka í Brussel,“ segir Brinkmann. Ísland þyrfti að leggja fram nýja umsókn og í kjölfarið þyrftu öll 28 aðildarríki sambandsins að beina því til framkvæmdastjórnar ESB að búa til nýtt álit um umsóknina og á grundvelli þess myndu ríkin 28 síðar þurfa að samþykkja að hefja viðræður við Ísland.

„Núna eru fleiri vafamál tengd stækkun innan ESB þannig að ferlið kann að verða eitthvað flóknara en það var.“ En þótt ferlið kynni að verða tímafrekara bendir Brinkmann á að vegna þess hve Ísland sé samtvinnað ESB í gegnum EES-samninginn yrði ferlið landinu auðveldara en öðrum löndum.

Brinkmann segist líka telja að sú vinna sem fram hafi farið í aðildarviðræðunum gagnist bæði Íslandi og ESB. Breytingar sem orðið hafi á sambandinu séu Íslandi í hag. Þar bendir hann á nýja, endurbætta sameiginlega fiskveiðistefnu sambandsins og nýtt regluverk um fjármálaeftirlit.

„Bróðurparturinn af lagabreytingum innan ESB snýr að innri markaði Evrópu og þær þarf Ísland hvort eð er að taka upp á grundvelli EES. Ég myndi því halda að breytingar sem orðið hafa hafi ekki skaðað þá vinnu sem unnin hefur verið í tengslum við aðildarviðræðurnar.“

Brinkmann segir afstöðu ESB til Íslands hins vegar óbreytta og að dyr sambandsins standi landinu enn opnar. „Ísland er enn mikilvægur nágranni og samstarfsaðili Evrópusambandslandanna,“ segir hann. Það sé hins vegar Íslands að taka ákvörðun um framhald aðildarviðræðnanna við sambandið. 

„En eins og sagt hefur verið áður, svo sem af Stefan Füle, fyrrverandi stækkunarstjóra, þá erum við viss um að hægt sé að finna í samningunum viðunandi lausnir fyrir Ísland.“

Ráðamenn undirbúa viðræðuslit

Í umræðum um slit aðildarviðræðna við ESB á þingi á mánudag sagði Bjarni Benediktsson fjármálaráðherra skráningu Íslands sem aðildarríkis vera formsatriði. „Myndist fyrir því meirihluti í framtíðinni og komist til valda ríkisstjórn sem hyggur á inngöngu í Evrópusambandið þá er hægt, innan eins kjörtímabils, að sækja um og ljúka slíkum aðildarviðræðum,“ sagði hann. Þá hefur Gunnar Bragi Sveinsson utanríkisráðherra sagt að breytingar sem orðið hafi á ESB þýði að ekki sé hægt að „kíkja í pakkann“. Þyrfti núverandi ríkisstjórn að hefja viðræður við ESB kallaði það á ný samningsmarkmið og aðferðafræði. „Sem þýðir að sjálfsögðu að það er rétt sem forsætisráðherra sagði að þessi vinna sem búið er að vinna núna er einskis virði ef það kæmi upp slík staða. Menn yrðu að byrja upp á nýtt,“ sagði hann í viðtali við fréttastofu 365 í gær.