Samband Bjarna og Sigmundar Davíðs telst alveg vonlaust

Þingið kemur saman í dag en Einar K. Guðfinnsson forseti Alþingis hefur sagt að ríkisstjórnin hafi boðað að lögð verði fram mörg stór og erfið mál. Þá er ekki úr vegi að huga nánar að sambandi foringja stjórnarflokkanna, þeirra Sigmundar Davíðs Gunnlaugssonar og Bjarna Benediktssonar. Samkvæmt kínverskri stjörnuspeki sætir furðu að þeir skuli yfirleitt geta starfað saman. Bjarni er hani en Sigmundur Davíð er héri, og þessar týpur eiga afskaplega illa saman.

Torfi Geirmundsson rakari hefur árum saman stúderað kínverska stjörnuspeki og er nú að vinna að bók um þessi fræði. Vísir fékk hann til að skoða nánar, út frá kínverskri stjörnuspeki, við hverju landsmenn mega búast og samkvæmt Torfa verður þetta harður pólitískur vetur. Þeir eru á móti hvor öðrum í dýrahringnum, andstæður, og eiga engan veginn saman.

Gjörvilegur gullhaninn Bjarni

Bjarni er fæddur 1970 en hann er fæddur í janúar, 26. janúar, þannig að hann telst með árinu 1969, árinu á undan sem er ár hanans. „Annars hefði hann verið hundur sem er örlítið skárra, en samt ekki gott,“ segir Torfi en kínversk stjörnuspeki er margslungin og fjölmargir þættir sem þarf að líta til.

„Haninn lætur alltaf á sér bera, vill vera aðal stjarnan í partíinu. Hann hefur gaman að því að vera aðal. Þannig að ég skil eiginlega ekki af hverju hann lét þetta eftir hinum að verða forsætisráðherra,“ segir Torfi og klórar sér í kollinum.

„Sko, hann hefur kannski lagst svona lágt því honum er mjög í mun að vera í þessari ríkistjórn. En, það hefur tekið á. Haninn er sprangandi páfugl. En, hann er ansi naskur, heldur sig við það sem er fullreynt, tekur ekki óþarfa áhættu og er oft góður í fjármálum. Það verður að muna það að haninn gefur ekkert eftir og fer ekkert á flug yfir fagurgala heldur er með augun opin allan tímann og ætlast til þess að stjórna eigin útkomu. Það sem heldur þessu sambandi gangandi er líklega það að Sigmundur Davíð er svona latur.“

Makráður héri Sigmundur Davíð

Og þá víkur sögunni að héranum Sigmundi Davíð. „Hérinn er óframfærinn, en getur verið aðlaðandi. Hérarnir eru oft vinsælir og með hóp í kringum sig. Hérinn mjög fínlegur og tilfinningasamur og þarf sterkan grunn til að byggja tilveru sína á, annars brotnar hann niður og grætur við fyrstu hindrun. Andleg vandamál hans geta stundum leitt til líkamlegra veikinda. Héra er illa við rökræður og reynir að forðast illindi, því hann virðist auðveld bráð frá náttúrunnar hendi. Hérarnir eru oft áhugalausir um að horfast í augu við vandamál og leysa þau. Og húðlatir. Þeir eru heimakærir og gera heimilið betra og þar sem Sigmundur Davíð er blár héri, fæddur 1975, hann er viðarhéri; þá er hann oft rekinn áfram af ótta við að missa af fé og frama. Honum hættir til sjálfselsku þegar hann er að reyna að ná takmarki sínu. Hérinn er þrjóskur, ævintýragjarn og hræðist ekki neitt þegar hagur hans er undir.“

Samband hana og héra

Líkur á að samband hana og héra gangi upp er um 53 prósenta líkur sem telst lélegt í þessum fræðum. „Sko, það er fyrst og fremst hérinn sem eyðir í lúxus og það líkar hananum ekki. Hætt við að hérinn vilji fá að vera í friði og hann þolir illa aðfinnslur hanans. Það er hætt við að haninn reyni að setja héranum skorður í peningamálum, og eyðsluseminni,“ segir Torfi og vísar til skuldaniðurfærslna ríkisstjórnarinnar.

En, Bjarni lét það nú engu að síður yfir sig ganga þó það gengi í berhögg við allt sem Sjálfstæðisflokkurinn gengur út á?

„Já, þetta er ráðgáta. Það er ekki víst að þetta hafi verið aðfinnslu- og áreynslulaust. Þetta er fyrst og fremst vont fyrir hérann, þetta samband, haninn er svo miklu sterkari á svellinu í viðskiptum.“

Torfi er nokkuð hrifinn af kínversku stjörnukorti Bjarna. „Athyglisvert er með Bjarna að hann er gullhani í sínu aðalmerki. Og hefur marga góða kosti sem hani. Yfirleitt er þetta frekar myndarlegt fólk sem hefur fengið gáfur og fegurð í vöggugjöf. Hérinn er makráður og heimakær og þarf að berjast fyrir sínu. Kemur meira sjálfkrafa sérstaklega hjá gullhananum sem er áreiðanlegur og heiðarlegur. Það sem hjálpar þessu, líklega hangir þetta samband á því að haninn er seinþreyttur til vandræða. Honum er illa við breytingar. Passar nokkuð vel við Bjarna. Þó þeir séu báðir silfurskeiðardrengir er meiri gjörvileiki hjá Bjarna en Sigmundi.“

Líkt og áður segir er alls ekki mælt með þessu sambandi í kínverskri stjörnuspeki. „Þó þetta virðist í lagi er alls ekki víst að það sé gott þó yfirborðið sýni annað. Sambönd sem eru svona vitlaus, geta hangið saman í einhver ár, en það getur aldrei orðið varanlegt.“