Hrundu árás Boko Haram

Nígerískir hermenn hafa náð að hrinda árás liðsmanna Boko Haram á borgina Maiduguri. Fjöldi sjónarvotta hefur staðfest þessar fregnir.

Þetta er í annað sinn á rúmri viku sem samtökin gera áhlaup á borgina.

Bardagar hófust snemma í gærmorgun og stóðu daglangt. Samkvæmt upplýsingum frá Nígeríustjórn voru skæruliðarnir hraktir á brott og mannfall Boko Haram mikið.

Maiduguri er fjölmennasta borg Bornó-héraðs og hefur Boko Haram lengi haft augastað á henni. Hernaðarlegt mikilvægi hennar er gífurlegt.