Kendrick Lamar er nýr kóngur rapptónlistar

Segja má að Kendrick Lamar hafi farið óhefðbundnar leiðir í för sinni á toppinn í rappheiminum. Platan hans, sem ber titilinn To Pimp a Butterfly og kom út í vikunni, sló met á Spotify. Engri plötu hefur verið streymt jafn oft í gegnum tónlistarveituna á einum degi. Notendur Spotify hlustuðu á plötuna í 9,6 milljónir skipta fyrsta sólarhringinn eftir að hún kom út.

Kendrick Lamar hefur vakið mikla athygli stærstu fjölmiðla í Bandaríkjunum. Meðal annars er hann á forsíðu nýjustu útgáfu tónlistarblaðsins Rolling Stone og birti The New York Times ítarlega umfjöllun um rapparann í upphafi vikunnar. To Pimp a Butterfly hefur hlotið einróma lof gagnrýnenda. Hún fær fjórar og hálfa stjörnu hjá Rolling Stone, Los Angeles Times og Billboard. Vefsíðan Metacritic tekur saman viðbrögð gagnrýnenda við plötum, kvikmyndum, tölvuleikjum og fleira.

Viðbrögð gagnrýnenda eru lögð saman og búin til einkunn út frá þeim. Á síðunni er platan með 95 stig af 100 mögulegum og situr í efsta sæti listans yfir allar plötur sem hafa komið út á árinu.

Öðruvísi yrkisefni og gildismat

Kendrick Lamar sker sig að miklu leyti úr hópi þeirra rappara sem eru vinsælastir nú á dögum. Hann er pólitískari en flestir aðrir og fjallar á frumlegan hátt um stöðu minnihlutahópa og kynþáttahyggju í Bandaríkjunum.

Lamar, sem er frá Compton í Los Angeles, segist líta á það sem skyldu sína og köllun að upphefja ekki glæpalífið og þær aðstæður sem margir í gamla hverfinu hans lifa við. „Þeir sem búa á götunni vilja flýja líf sitt þegar þeir hlusta á tónlist,“ segir rapparinn í samtali við New York Times.

Hann segist finna fyrir því að hann sé fyrirmynd og að hann þurfi að leggja sín lóð á vogarskálarnar til þess að breyta gildismati ungra aðdáenda sinna. „Ég er nánast eins og predikari fyrir þá,“ segir hann um aðdáendur sína og bætir við: „En orð mitt verður aldrei jafn sterkt og orð Guðs.“

Vísun í Harper Lee

Titill plötunnar nýútkomnu er vísun í eina þekktustu skáldsögu Bandaríkjanna, To Kill a Mockingbird eftir Harper Lee. Gagnrýnendur eru sammála um að þarna sé á ferðinni plata sem sé ólík flestu öðru sem heyrist frá þekktum röppurum.

Gagnrýnandi Time segir Kendrick Lamar vera teknískan rappara sem láti taktana ekki hefta flæði rappsins og líkir honum við málara og taktföstu undirspilinu við striga. Sem textahöfundur þykir hann frumlegur og grípur gjarnan í persónusköpun auk þess sem hann er sagður veita innsýn í líf kynslóðar sinnar á hárbeittan hátt. Gagnrýnandi Pitchfork segir plötuna varpa ljósi á erfiðleika og mótlæti heillar kynslóðar en hún sé samt sem áður uppfull af þeirri dirfsku sem þarf til þess að halda áfram á hverjum degi, þrátt fyrir að lífið sé hverfult.