Ensími snýr aftur með nýja plötu

Hljómsveitin Ensími hefur haldið sig til hlés á undanförnum árum og hefur ekki gefið út plötu frá því árið 2010, en þá kom platan Gæludýr út. Sveitin er þó að vakna úr dvala um þessar mundir og er að leggja lokahönd á sínu fimmtu breiðskífu og er hún væntanleg til útgáfu á næstu vikum. Nýja platan mun bera titilinn Herðubreið.

Það eru eflaust margir tónlistarunnendur sem gleðjast yfir því að sveitin er að snúa aftur, enda hefur Ensími verið ein virtasta rokkhljómsveitin þjóðarinnar, allt frá því að hún gaf út sína fyrstu plötu, Kafbátamúsík árið 1998, þó svo að sveitin hafi ekki verið á forsíðu allra blaða alltaf.

„Ætli við séum ekki búnir að vera að vinna í plötunni í svona þrjú til fjögur ár. Heildartíminn var samt ekkert svo langur því við tókum þetta í skorpum. Ef við myndum búa til vinnuskýrslu væri þetta ekkert svo langur tími,“ segir Hrafn Thoroddsen einn af stofnendum hljómsveitarinnar spurður út í vinnuna við Herðubreið.

Fara út fyrir þægindahringinn

Ensími leitar í ýmsar áttir á nýju plötunni og fer sveitin út fyrir þægindahringinn. „Síðasta plata var tekin upp live í Sundlauginni en þessa plötu höfum við unnið öðruvísi, við spiluðum til dæmis aldrei inn neitt lag allir í einu, nema kannski ég og Guðni bassaleikari. Þetta er meira stúdíóunnin plata en síðasta plata,“ segir Arnar Þór Gíslason, trommuleikari sveitarinnar. „Nýja platan er kannski aðeins rólegri en síðasta plata, minni ærslagangur enda erum við orðnir svo þroskaðir,“ bætir Arnar við léttur í lund. „Það má alveg segja að við séum að fara svolítið út fyrir þægindahringinn,“ segir Hrafn.

Hrafn og Arnar vilja þó ekki kalla þessa upprisu comeback. „Við höfum alltaf verið latir að spila tónleikum og sérstaklega undanfarin ár. Síðustu svona átta ár höfum við verið að spila kannski fjórum til fimm sinnum á ári. Við höfum alltaf passað að láta ekki líða of langt á milli tónleika. Trixið er að passa að þetta stoppi ekki,“ útskýrir Hrafn og bætir við; „Við verðum líka ekki leiðir á að spila slagarana ef við spilum þetta sjaldan. Við þurfum þó alltaf að æfa þá aftur.“



Eins og fjölskylda

Nafn plötunnar er vísun í eitt lag plötunnar. „Nafnið Herðubreið er vísun í lag á plötunni og snýst um að komast yfir hindranir, sigrast á hlutum, klífa fjöll og það lá beinast við að draga fram drottningu íslenskra fjalla,“ segir Hrafn.

Frá því að Ensími var stofnuð árið 1996 hafa talsverðar mannabreytingar átt sér stað en sá kjarni sem myndar sveitina í dag er þéttur og líta þeir á sig sem eins konar fjölskyldu. „Við höfum verið frekar þéttur kjarni síðustu svona átta árin,“ segir Hrafn. „Við erum í raun eins og fjölskylda. Við erum líka í mörgum öðrum verkefnum saman,“ bætir Arnar við. Kjarni sveitarinnar hefur verið að leika saman í öðrum hljómsveitum eins og Dr. Spock, með Mugison, Bang Gang svo nokkur nöfn séu nefnd. Í dag skipa sveitina þeir Hrafn Thoroddsen söngvari, gítarleikari og hljómborðsleikari, Guðni Finnsson bassaleikari, Franz Gunnarsson gítarleikari, Arnar Þór Gíslason trommuleikari og Þorbjörn Sigurðsson hljómborðsleikari.

Kafbátamúsik

Fyrsta plata Ensími leit dagsins ljós í október 1998 og hlaut nafnið Kafbátamúsik. Platan fékk frábærar viðtökur og fékk hljómsveitin tvenn verðlaun á Íslensku tónlistarverðlaununum það árið; sem bjartasta vonin og lagið Atari var valið lag ársins. 

Bmx

Upptökustjórinn heimsþekkti Steve Albini sem er best þekktur fyrir vinnu sína með hljómsveitum og listamönnum eins og Pixies og Nirvana kom til landsins og hljóðritaði hluta plötunnar sem síðan hlaut nafnið BMX og kom hún út á haustmánuðum 1999. 

Ensími

Í október 2002 kom síðan út platan Ensími á vegum HITT/ Eddu og er þetta fyrsta plata Ensími sungin á ensku.

Gæludýr

Platan var hljóðrituð í Sundlauginni og öll lögin tíu sem prýða plötuna eru sungin á íslensku. Platan kom út árið 2010.

Semja sjaldan saman

Spurður út lagasmíðarnar segir Hrafn, aðalalagahöfundur Ensími, hljómsveitina ekki hittast í æfingahúsnæðinu til þess að semja saman, heldur verði lögin oftast til þegar menn eru hver í sínu horninu. „Ég hef yfirleitt komið með grunnhugmyndirnar og oft eru demóin sem ég kem með nokkuð tilbúin. Meðlimir sveitarinnar eru allir í 100 öðrum böndum þannig að það er extra erfitt að koma hópnum saman. Þess vegna höfum ekki verið semja saman í æfingahúsnæði,“ útskýrir Hrafn.

Hljómsveitin á mikið til af efni sem hefur ekki ratað á plötu. „Þegar við erum að vinna þá verður til fullt af lögum og lögin eru svo unnin mislangt. Sum lög fá meiri vinnu en önnur og sum þurfa að víkja. Það er til í rosalega mikið af efni ef b-side platan kemur einhvern tímann út,“ segir Arnar og hlær. 

Ensími ætlar að fagna nýju plötunni með tónleikum sem fara fram þann 13. júní í Gamla bíói. Þar verður nýja platan leikin í heild sinni. En fáum við að heyra eitthvað af eldri slögurunum? „Fólk fær að heyra slagarana á tónleikunum, það er nóg til af lögum,“ segir Arnar.

Ensími ætlar að koma fram á fleiri tónleikum í sumar en þær dagsetningar sem eru bókaðar eru Secret Solstice-hátíðin og Bræðslan. „Það á eitthvað eftir að bætast við af tónleikum, við ætlum að vera duglegir að fylgja plötunni eftir,“ bætir Hrafn við.

Miðasala er á Tix.is.