Vinaböndin Mammút og Samaris í eina sæng

„Það er nefnilega dæmigert að stilla okkur upp sem keppinautum, en við erum sannkölluð vinabönd, þar sem við höfum fylgst að í mörg ár,“ segir Jófríður Ákadóttir, söngkona rafpoppsveitarinnar Samaris, en bandið hefur ákveðið í slagtogi við Mammút að blása til risa tónleikagjörnings í næsta mánuði. Munu böndin meðal annars flytja lög hvort annars.

„Bæði böndin eru á plötusamningi hjá erlendum fyrirtækjum, við hjá One Litle Indian og Mammút hjá Bella Union, og þar ytra er mikil samkeppni, sem við hérna á Íslandi þekkjum ekki,“ útskýrir Jófríður og bendir á að landslag tónlistarmanna á Íslandi sé um margt ólíkt því sem gerist annars staðar.

Hér á landi leggi sig allir fram við að aðstoða eftir fremsta megni. „Okkur langaði að búa til viðburð og fagna þessu svolítið, böndin hafa fylgst að í gegnum tíðina, svo nú fannst okkur tími til kominn að taka málin í okkar hendur. Sumsé ekki vera alltaf þátttakendur, sem er vissulega gaman líka, en nú gerum við þetta á okkar hátt. Þannig er þetta stuðningur Mammút við Samaris í verki og vitaskuld öfugt.“



Segir Jófríður að tónleikagestir geti átt von á miklu sjónarspili. „Við erum mikið myndlistarfólk og höfum gaman af að framkvæma gjörninga, svo við ætlum að teygja okkur svolítið í allar áttir með það.“