„Ég kynntist manni sem heitir Andy, sem er umboðsmaður Sams, og hann bað mig um að syngja lagið fyrir sig og ég söng það og sendi honum það út,“ segir Baddi um upphafið. Lagið er upphaflega eftir skosku rokkhljómsveitina Del Amitri.
Kynni hans og Hollendinganna má rekja til þess þegar Baddi leysti trúbador í miðbæ Reykjavíkur af um stundarsakir og tók eitt lag, sem heillaði Hollendingana upp úr skónum.
„Bróðir umboðsmannsins kom til mín og spurði mig: Ertu söngvarinn í Jeff Who? og sagðist vera mikill aðdáandi og vildi kynna mig fyrir bróður sínum, Andy. Þegar ég kynntist Andy þá spurði hann hvort ég gæti samið lög fyrir skjólstæðing sinn sem er Sam Koop,“ útskýrir Baddi.
Hollendingarnir vildu einnig fá myndband af Badda syngja og spila lagið sem Sam notaði svo á tónleikum.
„Myndbandið var komið með um 65 þúsund „views“ á fimm dögum og er víst núna í mikilli spilun í hollensku útvarpi. Lagið er líklega að fara í svokallaða A-spilun í hollenska ríkisútvarpinu,“ segir Baddi, en hann er einmitt á leið í viðtal við hollenska ríkisútvarpið í dag.
Fyrir utan útvarpsspilunina er myndbandið við lagið mest umbeðna myndbandið á sjónvarpsstöð sem heitir Oranje TV í Hollandi. „Þetta er einhvers konar MTV-stöð Hollands.“ Lagið er einnig komið út á Spotify.
Spurður út í hvort Jeff Who? sé einnig á leið til Hollands segir Baddi að svo sé ekki.
„Ekki nema Jeff Who? fari í massíva spilun í Hollandi, þá veit maður aldrei,“ segir hann og hlær.
Baddi segist stefna á frekara samstarf með Sam og gerir ráð fyrir að semja fleiri lög fyrir hollenska tónlistarmanninn.
„Ég veit ekki alveg hvernig þetta verður en það væri fínt að semja fyrir hann, sérstaklega ef hann er að verða svona stór,“ bætir hann við.
Baddi hefur nú þegar látið Hollendinginn hafa lag sem hann og píanóleikarinn Valdimar Kristjónsson sömdu og er væntanlegt til útgáfu í Hollandi.
