Eins og undanfarin ár þurfa færustu handboltamenn Olís-deilda karla og kvenna að læsa inni konfektskálina því keppt verður um Flugfélags Íslands-bikarinn milli jóla og nýárs. Þar mætast efstu fjögur liðin í báðum deildunum; efsta liðið mætir því sem er í fjórða sæti í undanúrslitum og annað og þriðja sætið mætast. Sigurvegararnir berjast svo um deildabikarinn sjálfan í úrslitaleik.
Í kvennaflokki verður endurtekning á úrslitaleiknum frá því í fyrra í undanúrslitunum þar sem Fram og Valur mætast en Safaramýrarliðið hafði betur í Reykjavíkurslagnum um sigur í bikarnum á síðasta ári.
Í hinum undanúrslitaleiknum mætast nágrannaliðin Stjarnan og Haukar en það verður síðasti leikur dagsins. Öll undanúrslitin fara fram sama daginn, á morgun, og úrslitaleikurinn á miðvikudaginn.
Ríkjandi deildabikarmeistarar Hauka þykja ansi líklegir til sigurs en þeir mæta FH í Hafnarfjarðarslag. Því miður fyrir handboltaáhugamenn fer mótið ekki fram í Strandgötu þetta árið heldur Hertz-hellinum á Seltjarnarnesi en ekki hefði verið amalegt að horfa á Hafnarfjarðarslaginn í gömlu góðu Strandgötunni.
Haukarnir eru í öðru sæti Olís-deildar karla eftir að vinna níu leiki í röð. Þeir einmitt tóku FH með einu marki í dramatískum Hafnarfjarðarslag í síðasta leik fyrir HM-fríið.
Topplið Aftureldingar mætir Valsmönnum í fyrri undanúrslitaleik karla. Karlalið Vals líkt og konurnar tapaði í úrslitum í fyrra og þarf nú að komast í gegnum strákana úr kjúklingabænum ætli þeir sér alla leið á ný.
Dagskráin:
Þriðjudagur 27. desember
kl.16.00 | Fram - Valur | Konur
kl.17.45 | Afturelding - Valur | Karlar
kl.19.30 | Haukar - FH | Karlar
kl.21.15 | Stjarnan - Haukar | Konur
Miðvikudagur 28.desember
kl.18.30 | Úrslit kvenna
kl.20.15 | Úrslit karla
Hafnarfjarðarslagur á Seltjarnarnesi
