Forsetaáskorun Vísis: Byrjaði og hætti að reykja þegar hún var fimm ára

Guðrún Margrét Pálsdóttir hjúkrunarfræðingur borðaði svið, ábrysti og fjallagrasamjólk með bestu lyst þegar hún var barn. Hún hefur aldrei migið í saltan sjó en gaf heimilislausum dreng í Gvatemala eitt sinn Nýja Testamentið eða „Nuevo Testamento.“ 

Þetta og fleira kemur fram hér að neðan í svörum Guðrúnar Margrétar við Forsetaáskorun Vísis.

Vísir leggur mikið upp úr því að umfjöllunin um forsetakosningarnar sé ítarleg og úr öllum áttum, líka skemmtileg. Því lögðum við fyrir alla forsetaframbjóðendur skemmtilegan spurningalista með spurningum af öllu tagi, sumar erfiðari en aðrar en allar í persónulegri kantinum. Vísir mun birta svörin nú í vikunni fyrir kosningarnar sem fram fara 25. júní. Guðrún Margrét er næst í röðinni.

Hver er fallegasti staðurinn á Íslandi?

Af mörgum ótrúlega fallegum eru Hljóðaklettar efstir í huganum, svo tjörnin innst í Ásbyrgi og Svartifoss.

Hundar eða kettir?

Hundar núna en lengi vel voru það kettir sem höfðu yfirhöndina.

Hver er stærsta stundin í lífi þínu?

Þegar ég eignaðist fyrsta barnið mitt og reyndar jafnstórar stundir þegar ég eignaðist hin þrjú börnin.

Hver er uppáhaldsmaturinn þinn?

Þegar ég var ung voru svið, fjallagrasamjólk og ábrystir í mestu uppáhaldi. Núna er allur hollur matur í uppáhaldi og ég á erfitt með að gera upp á milli lambakjöts, kjúklings, fisks og grænmetisrétta. Lambakjöt er þó í mestu uppáhaldi ef grillað er.

Hvernig bíl ekur þú?

Toyota Prius, árg. 2004, sem er hálfur rafmagnsbíll.

Besta minningin?

Brosið sem kom á andlit 11 ára gamals götudrengs í Guatemala þegar ég dró upp Nýja testamenti og gaf honum. Hann var að búa sig til svefns á gangstéttinni og aðstæður hans stungu mig í hjartað. Þetta er í minningunni fallegasta bros sem ég hef séð, hann var svo glaður og þakklátur. „Nuevo testamento” sagði hann og ljómaði eins og sólin.

Hefur þú verið tekinn af lögreglunni?

Já, fyrir að aka of hratt og fyrir að stoppa ekki við stöðvunarskyldu.

Hverju sérðu mest eftir?

Að hafa ekki heimsótt fólk sem ég hefði átt að heimsækja og svo dó það án þess að ég fengi tækifæri til að bæta fyrir það.

Reykir þú?

Nei, ég prófaði einn dag þegar ég var 5 ára og lét það nægja.

Uppáhalds drykkur(áfengur)?

Ég drekk yfirhöfuð ekki áfenga drykki, en ef ég gerði það væri það sjálfsagt rauðvín. Annars er engifersafi í uppáhaldi hjá mér (ekki áfengur).

Uppáhalds bíómynd?

Listi Schindlers, hún hafði veruleg áhrif á mig

Uppáhalds tónlistarmaður?

Andrae Crouch

Hvaða lag kemur þér í gírinn?

Happy með Pharell Williams

Draumaferðalagið?

Ég hef ferðast svo mikið um ævina að nú eru mest heillandi ferðalögin að vera í tjaldi með fjölskyldu og vinum í Atlavík, fara í göngutúra um Hallormsstaðaskóg og grilla á ströndinni í góðu veðri.

Hefur þú migið í saltan sjó?

Nei, en ég oft verið á sjó og var á handfæraveiðum á Eyjafirði sumarpart á unglingsárum.

Hvað er það skrýtnasta sem þú hefur gert?

Ætli það sé ekki að sofa uppi á húsþaki eða fara í forsetaframboð.

Hefur þú viðurkennt mistök?

Að sjálfsögðu hef ég margoft gert það, bæði smá og stór.

Hverju ertu stoltastur af?

Af öllum börnunum úti í heimi sem eiga bjarta framtíð af því að maður gafst ekki upp heldur lét drauminn verða að veruleika þótt það kostaði fórnir, kannski ekki blóð en alla vega svita og tár.

Rómantískasta augnablik í lífinu?

Að standa með eiginmanninum á sumarsíðkvöldi við spegilsléttan sjó þar sem við höldum utan um hvort annað, hlustum á fuglana og horfum á fallegt sólarlag. Það er ekkert sem toppar það í rómantík.

Trúir þú á líf eftir dauðann?

Já sannarlega, ég veit að Guð er til.

Ef það væri gerð Hollywood kvikmynd um ævi þína, hver ætti að leika þig?

Þetta er erfið spurning, kannski Julia Roberts.