Arnór Ingvi Traustason og félagar hans í austurríska liðinu Rapid Vín eru komnir áfram í 4. umferð forkeppni Evrópudeildarinnar eftir 3-0 sigur á Zhodino frá Búlgaríu í kvöld.
Fyrri leiknum í Búlgaríu lyktaði með markalausu en í leiknum í kvöld voru Austurríkismennirnir mun sterkari aðilinn. Þeir áttu t.a.m. alls 27 skot gegn aðeins fjórum hjá gestunum.
Mario Pavelic, Thomas Schrammel og Louis Schaub skoruðu mörk Rapid Vín í leiknum í kvöld.
Arnór Ingvi var í byrjunarliði austurríska liðsins en fór af velli eftir 68 mínútna leik.
Þá komst danska liðið Bröndby einnig áfram eftir 3-1 sigur á Herthu Berlin á heimavelli. Þýska liðið vann fyrri leikinn 1-0 en Bröndby hafði betur í einvíginu, 3-2 samanlagt.
Finnski framherjinn Teemu Pukki var hetja Bröndby en hann skoraði öll þrjú mörk liðsins í leiknum í kvöld.
Hjörtur Hermannsson sat allan tímann á varamannabekk Bröndby.
Öruggt hjá Arnóri og félögum | Bröndby komið áfram
Tengdar fréttir
West Ham vann fyrsta leikinn á Ólympíuleikvanginum
West Ham vann fyrsta keppnisleik sinn á Ólympíuleikvanginum í London, nýjum heimavelli sínum, þegar slóvenska liðið Domzale kom í heimsókn í 3. umferð forkeppni Evrópudeildarinnar í kvöld.
Lið Ragnars og Hjálmars áfram í Evrópudeildinni
Krasnodar og IFK Göteborg, lið íslensku varnarmannanna Ragnars Sigurðssonar og Hjálmars Jónssonar, komust í kvöld áfram í 4. umferð forkeppni Evrópudeildarinnar.
Rúnar Már og félagar áfram eftir framlengingu | AIK úr leik
Rúnar Már Sigurjónsson og félagar í svissneska liðinu Grasshopper komust áfram í 4. umferð forkeppni Evrópudeildarinnar eftir 3-3 jafntefli við Apollon frá Kýpur.
