Flugferð frá Tenerife til Keflavíkur, sem farin var þann 26. ágúst á síðasta ári, vakti þó nokkra athygli í fjölmiðlum.
Alla jafna tekur ferðalagið fimm klukkustundir en tók í þessu tilfelli rúman sólarhring. Vélinni seinkaði frá Tenerife og hún millilenti svo á Shannon-flugvelli á Írlandi þar sem farþegar þurftu að dvelja um nóttina.
Bergur Þorri Benjamínsson var einn farþega í umræddri ferð og er orðinn þreyttur á seinagangi yfirvalda.
„Það er vægast sagt frekar pirrandi að þurfa að bíða í eitt ár eftir því að fá niðurstöðu í þessu annars einfalda máli.
Samgöngustofa tók sér þrjá mánuði frá því kvartað var þar til ákvörðun lá fyrir, ráðuneytið tekur sér hins vegar nær átta mánuði og á meðan bíða allir farþegarnir spenntir eftir niðurstöðunum,“ segir Bergur Þorri.
Samkvæmt úrskurði Samgöngustofu frá 15. desember í fyrra var flugfélagið Primera Air dæmt til að greiða farþegum 400 evrur í skaðabætur. Úrskurðurinn var kærður til innanríkisráðuneytisins. Farþegar bíða því enn eftir lokaúrskurði.
Farþegar í sólarhringsferðalagi frá Tenerife í fyrra dauðþreyttir á seinagangi
Tengdar fréttir
Of miklar upplýsingar sköpuðu rugling
Ásgeir Vilhjálmsson, framkvæmdastjóri hjá Primera Air, segir flugfélagið harmar þær miklu tafir sem urðu á flugi frá Tenerife til Íslands í vikunni.
„Þetta er skammarlegt fyrir flugfélagið“
Farþegi í vél Primera Air sem gista þurfti eina nótt á Írlandi vandar flugfélaginu ekki kveðjurnar.
„Fólk talar ekki mjög fallega um Primera Air þessa stundina“
Farþegar í vél Primera Air hafa verið sólarhring á leiðinni heim til Íslands frá Tenerife.
