Lauga­ás fagnar sam­keppni frá Laun­dromat en líst illa á hjóla­stólaramp

„Mér finnst þetta æðislegt. Það er um að gera að fá nógu marga þarna, enda er það þannig að því fleiri veitingastaðir þeim mun fleira fólk. Þannig að það er bara frábært að fá samkeppni,“ segir Guðmundur Ragnarsson, eigandi veitingastaðarins Laugaáss.

Ætla mætti á orðum Guðmundar að Þvottakaffi ehf, sem hyggur á að opna kaffihúsið Laundromat í norðurenda Laugarásvegar 1, ætti ekki eftir að eiga í miklum erfiðleikum með að koma starfseminni á fót. Annað hefur komið á daginn.

Fréttatíminn greindi frá því á föstudag að ekki hefði fengist framkvæmdaleyfi þar sem enn vantaði samþykki nágranna. Umræddir nágrannar eru aðrir íbúar í húsinu og sömuleiðis eigendur Laugaáss.

Fjögur atriði sem tekist er á um

Laugarásvegur 1 skiptist í fjórar einingar á jarðhæð og íbúðir fyrir ofan. Einingarnar á jarðhæð eru fjórar, tvær minni á hvorum enda og stærri einingar þar á milli. Hárgreiðslustofa er á suðurendanum, næst honum kemur ítalskur veitingastaður, svo Laugaás og að lokum, á norðurendanum, lítið rými þar sem áður var starfrækt efnalaug í mörg ár. Þar vill Jóhann Friðrik Haraldsson opna Laundromat kaffihús með leyfi fyrir þrjátíu gestum.

Efnt var til íbúafundar þann 26. júlí síðastliðinn þar sem Jóhann og félagar vonuðust til að fá leyfi fyrir fjórum aðgerðum við húsnæðið til að uppfylla skilyrði byggingarfulltrúa.

1. Ramp fyrir fatlaða að aftanverðu 

2. Loftræstistokk fyrir aftan hús

3. Læstan gaskútaskáp fyrir aftan hús

4. Sorpaðstöðu fyrir aftan hús

Áhyggjur íbúa í húsnæðinu snúa aðallega að opnunartímanum sem fyrirhugaður er að verði frá klukkan átta að morgni til 23 að kvöldi. Sömuleiðis verða einhverjir þeirra fyrir ónæði af loftræstistokk Laugaáss, í formi hávaða, að þeim líst ekki á uppsetningu annars stokks. Er þá um að ræða íbúa á þeim enda hússins sem kaffihúsið á að opna.

Fulltrúi Laugaás mótfallinn framkvæmdum

Jóhann Friðrik segir í samtali við Vísi fagna því að eigendur Laugaáss fagni samkeppni og auknu flæði fólks. Það hafi þó ekki verið upplifun hans frá fundinum í sumar þegar Hermann Erlingsson mætti fyrir hönd eigenda Laugaáss.

Hermann lýsti því yfir að Laugaás væri mótfallinn öllum fjórum framkvæmdum og lagðar voru fram útskýringar á hvers vegna.

Rampurinn væri ekki í lagi því óheppilegt væri að vera með aðgengi fyrir viðskiptavini að aftan þar sem vöruafhendingar til og frá veitingastaðnum eigi sér stað. Þá væri Laugaás mótfallið loftræsistokk en ástæður þess fylgdu ekki.

Gaskútaskápur og sorpaðstaða fyrir aftan hús væru heldur ekki í lagi því það gæti hamlað vöruflutningum.

Kom viðbrögðin á óvart

Friðrik Weisshapel, eigandi vörumerkisins Laundromat, vakti athygli á málinu á Facebook í dag.

„Það sem kom mest á óvart var að kollegar okkar, veitingastaðurinn Lauga-ás sem eru nágrannar okkar þarna vilja ekki gefa okkur leyfi fyrir því sem nefnt er hér, þar með talið hjólastólaramp, það kom mér persónulega mjög á óvart,“ skrifar Friðrik.

Guðmundur segir það af og frá, þrátt fyrir að fyrir liggi mótbárur fulltrúa veitingastaðarins í fundargerðinni frá 26. júlí, að veitingastaðurinn hafi ekki gefið samþykki. Guðmundur segir staðinn ekki hafa neinn rétt til þess.

„Það er hjólastólarampur úti á enda, sá sami og við notum. Við getum ekki samþykkt eða hafnað, það er bara íbúanna að gera það. Okkur finnst bara æðislegt að þau séu að koma hingað.“

Umræddur rampur er á suðurenda hússins en rampurinn sem Laundromat-menn vilja setja upp er á norðurenda, hjá staðnum þeirra til að gefa gestum tækifæri á að fara þeim megin inn. Guðmundur segist sjálfur hafa reynt að fá samþykki fyrir ákveðnum hlutum fyrir Laugaás í gegnum tíðina, en ekki haft erindi sem erfiði.

Töluverðar umræður hafa spunnist um málið á Facebook, annars vegar á Facebook-síðunni Laugarneshverfi og hins vegar síðunni Langholtshverfi. Sitt sýnist hverjum en þó virðist sem almenn ánægja ríki með fyrirhugaða opnun Laundromat.

Opnun frá 8-23 kæmi aldrei til greina

Eigendur Laugaás minna í bókun sem fylgir fundargerðinni frá því í júlí á að veitingastaðurinn hafi leyfi til mun rýmri opnunartíma en veitingastaðurinn nýti. Ástæða þess sé tillitsemi við íbúa.

„Að hafa opið frá 8:00 á morgnana til 23:00 á kvöldin alla daga kæmi aldrei til greina,“ segir í athugasemdum sem Guðmundur skrifar undir. Þá séu nú þegar bílastæðamál við húsið mjög erfið og dregið í efa að bílastæði sem séu við húsið dugi viðskiptavinum þriggja samliggjandi staða

„Almennt séð er Laugaás ehf mjög hlynnt lifandi starfsemi í húsinu og telur aukna umferð innan vissra marka aðeins geta bætt rekstur veitingastaðarins. Engu að síður sjáum við mikla meinbugi á þeim breytingum sem fyrirhugaðar eru. Einnig er afar mikilvægt að sú starfsemi sem fer fram í húsinu sé í góðri sátt við íbúa þess og nágranna.“

Fjörutíu ára stokkur ekki sambærilegur

Jóhann Friðrik minnir á að um atvinnuhúsnæði sé að ræða. Þar hafi verið starfrækt efnalaug, með tilheyrandi búnaði, og það hljóti að vera réttur eigenda að geta verið með starfsemi í húsinu. Húsið verði lítið í sniðum, með leyfi fyrir þrjátíu manns í sætum og þar verði augljóslega ekki partýstemning. Það ætti fólk að þekkja sem hafi farið á Laundromat í Austurstræti en kaffihúsið er mikið sótt af barnafólki.

Þó sé búið að leggjast í mikla vinnu við að hljóðeinangra vel, setja ull og gifs í loftið sem ekki var áður, og það hafi verið sýnt á fundinum. Viðbrögðin hafi verið skammir fyrir lætin sem fylgdu því þegar umrædd einangrun var sett upp.

Þá bendir Jóhann Friðrik á að aðalástæða þess að íbúar hússins séu mótfallnir loftræstistokki sé slæm reynsla íbúa af loftræstistokki Laugaáss. Sá hafi hins vegar verið settur upp fyrir tæpum fjörutíu árum og síðan hafi tækninni fleygt fram. Nýr stokkur yrði bæði minni, þéttari og ætti ekki að skapa ónæði.

Þá sé honum fyrirmunað að skilja hvernig rampur við annan tveggja innganga að nýja kaffihúsinu verði til trafala. Hann standi ekki lengra út í portið en stigi sem liggi niður í kjallara og hann hafi sýnt eigendum Laugaáss mynd því til staðfestingar frá vöruflutningum á dögunum. Þeir hafi ekki viljað breyta afstöðu sinni á nokkurn hátt.

Framundan sé að boða til nýs íbúafundar þar sem til standi að kynna málin betur fyrir nágrönnunum. Gangi það engu betur verði sótt um undanþágu til borgarinnar enda sé svart á hvítu að um atvinnuhúsnæði sé að ræða, og þeir þurfi að uppfylla kröfur byggingafulltrúa. ​