Minnst 108 eru látnir eftir að fellibylurinn Matthew fór yfir Haítí á þriðjudaginn. Innanríkisráðherra landsins hefur staðfest töluna við AFP fréttaveituna en áður var vitað að minnst 23 hefðu látist. 50 létu lífið í bænum Roche-a-Bateau og hann er sagður gjörónýtur.
Matthew er kröftugasti fellibylurinn sem herjar á Karíbahafið í tæpan áratug. Hann stefnir nú hraðbyr á Flórída og austurströnd Bandaríkjanna. Þar undirbúa íbúar sig fyrir fellibylinn sem skellur á þeim í kvöld og í nótt.
Samkvæmt Reuters fréttaveitunni eru verslanir tómar víða í Flórída, Georgíu og í bæði Norður- og Suður Karólínu.
Ríkisstjóri Flórída, Rick Scott, segir að fellibylurinn gæti valdið gífurlegum skaða. Hann hvatti um eina og hálfa milljón íbúa til að yfirgefa heimili sín í dag.
„Ef þið viljið ekki flytja ykkur um set, hugsið um allt fólkið sem hefur dáið. Tíminn er að renna út. Fellibylurinn mun greinilega annað hvort skella beint á okkur eða fara með ströndinni og við munum þurfa að eiga við mikinn vind.“
Barack Obama, forseti Bandaríkjanna, hefur lýst yfir neyðarástandi í Flórída.
Minnst 108 látnir á Haítí
Tengdar fréttir
Eiga í vandræðum með að komast á hamfarasvæðin á Haítí
Fellibylurinn Matthew er sá öflugasti í tæpan áratug og eru að minnsta kosti tíu látnir og þúsundir hafa misst heimili sín.
