Koeman beið lægri hlut fyrir gamla liðinu | Sjáðu mörkin

Southampton vann 1-0 sigur á Everton í ensku úrvalsdeildinni í dag og skemmdi þar með endurkomu þjálfara Everton, Ronald Koeman, á St.Marys en Koeman stýrði áður liði Southampton.

Fyrir leikinn voru liðsmenn Everton fimm stigum á undan Southampton í töflunni og sátu í 7.sæti deildarinnar. Southampton gat lyft sér upp í 10.sætið með sigri.

Heimamenn byrjuðu af miklum krafti. Charlie Austin kom liðinu yfir strax á 1.mínútu leiksins með skalla af stuttu færi. Sjötta mark Austin í deildinni á tímabilinu.

Southampton var sterkara liðið í leiknum í dag og þó Everton hafi átt níu skot að marki var ekkert þeirra sem hitti rammann. Það segir sig sjálft að það er erfitt að skora þegar menn hitta ekki á markið og það voru því heimamenn sem fóru með 1-0 sigur af hólmi.

Sigurinn lyftir Southampton upp í 10.sætið en Everton situr áfram í 7.sæti.