Leikstjóri Justice League deilir nýjum myndum af tökustað á Íslandi

Leikstjórinn Zack Snyder hefur birt myndir af tökustað stórmyndarinnar Justice League á Íslandi á Vero-aðgangi sínum. Tökur á myndinni fóru fram á Ströndum í október síðastliðnum þar sem tökuliðið hafðist við Í Djúpavík og í Gjögri.

Í Justice League munu Batman, Superman, Wonder Woman, The Flash, Aquaman og Cyborg taka höndum saman til að verja mannkynið gegn illmennum.

Á myndunum sem Snyder deilir má sjá leikarann Jason Momoa klæddan sem Arthur Curry, sem gengur einnig undir nafninu Aquaman, á Ströndum.

Þá má einnig sjá bryggjuna á Gjögri en bryggjuhúsið hefur verið merkt með skiltinu: Newfoundlands finest seafood, eða fínasta sjávarfang Nýfundnalands.

Má því leiða líkur að því að tökurnar sem voru á Ströndum eigi að gerast á Nýfundnalandi. Í stiklu úr myndinni sem frumsýnd var á Comic Con í San Diego í júlí síðastliðnum mátti sjá Ben Affleck, í hlutverki Bruce Wayne, tala við gesti á ónefndu öldurhúsi þar sem hann segist vera að leita að manni sem kemur með háflóði og færir íbúum þorpsins fisk þegar hvað harðast er í ári.

Tökulið myndarinnar breytti meðal annars gömlu verksmiðjunni í Djúpavík í einskonar öldurhús. Sjá nánar hér.

Í þessu atriði mátti sjá nokkra íslenska leikara, þar á meðal Ingvar E. Sigurðsson, Ágústu Evu Erlendsdóttur, Kristbjörgu Kjeld og Salóme Gunnarsdóttur. Var sú sena tekin upp í Lundúnum síðastliðið vor en kvikmyndaverið Warner Bros. sendi flugvél eftir íslensku leikurunum til að flytja þá þangað frá Íslandi. Er Ingvar E. sagður hafa fengið nokkrar línur á móti Ben Affleck við tökur á atriðinu, en óvíst er hvort það muni rata í lokaútgáfu myndarinnar.

Stórar stjörnur voru staddar hér á landi í október við tökur á myndinni, þar á meðal fyrrnefndur Jason Momoa, Ben Affleck, Willem Dafoe og leikkonan Amber Heard.

Willem Dafoe leikur Nuidis Vulko sem er einn nánasti samstarfsmaður Arthur Curry/Aquaman en þeir eru báðir hluti af Atlantis-fólkinu sem lifir neðansjávar.

Warner Bros birti einnig mynd af Amber Heard í fullum skrúða í fjörunni í Gjögri á Ströndum en leikur Meru í Justice League en í DC-myndasagnaheiminum er hún eiginkona Arthur Curry.

BREAKING: Here is our first look of #AmberHeard as Mera in #JusticeLeague pic.twitter.com/AzkeaHSaLw

— Justice League (@JL_Movie) October 12, 2016

Tökurnar í Djúpavík gætu því mögulega tengst leit Bruce Wayne að Aquaman líkt og kom fram í stiklu myndarinnar og að sú leit hans leiði hann til Nýfundnalands.