Færeyingar finna þefinn af olíunni

Færeyingar hafa sett í gang fjórða olíuleitarútboðið í sögu eyjanna. Fjallað var um málið í fréttum Stöðvar 2.

Þegar hafa níu olíubrunnar verið boraðir í lögsögu Færeyja en aðeins fundist vottur af olíu til þessa. Þrjú ár eru liðin frá því síðast var borað eftir olíu við Færeyjar en norska félagið Statoil lagði þá tugi milljarða króna í að bora tvo brunna sem báðir reyndust þurrir.

En þrátt fyrir þau vonbrigði hafa færeysk stjórnvöld ekki gefist upp og í síðustu viku lýsti utanríkis- og atvinnumálaráðherrann, Poul Michelsen, því formlega yfir að fjórða olíuleitarútboð Færeyinga væri hafið.

Við það tækifæri fengu viðstaddir að þefa af borkjörnum sem komið hafa upp í fyrri borunum til sannindamerkis um að þar sé olíu að finna, þótt enn sem komið er hafi hún ekki fundist í vinnanlegu magni.

Það sem rekur færeysk stjórnvöld áfram eru gas- og olíulindir sem fundist hafa norðan Skotlands á landgrunni Hjaltlandseyja en sumar þeirra eru rétt við lögsögumörk Færeyja. Brunnarnir níu voru allir boraðir suðaustur af Færeyjum, sá fyrsti fyrir sautján árum.

Þótt engin olíulind hafi enn fundist hefur olíuleitin leitt til þess að Færeyingar hafa byggt upp umtalsverða þjónustustarfsemi í kringum olíuiðnað, en þar njóta þeir nálægðar við borpallana í Norðursjó og Noregshafi. Rifja má upp að einn stærsti borpallur heims var fyrir þremur árum í viðamikilli klössun í þjónustumiðstöðinni í Rúnavík. 

Hvort olíufélög heims hafi enn áhuga á færeyska landgrunninu kemur í ljós í febrúar á næsta ári.