Steven Gerrard trylltist af gleði þegar Liverpool jafnaði | Myndband

Steven Gerrard, fyrrverandi leikmaður og fyrirliði Liverpool, fagnaði eins og óður maður þegar Georginio Wijnaldum jafnaði fyrir hans gamla lið, 1-1, á móti Chelsea í stórleik 23. umferðar ensku úrvalsdeildarinnar í fótbolta í gærkvöldi.

Liverpool lenti 1-0 undir þegar David Luiz skoraði með fallegu skoti beint úr aukaspyrnu í fyrri hálfleik en hollenski miðjumaðurinn tryggði sínum mönnum eitt stig með skallamarki í þeim síðari.

Steven Gerrard var einn sérfræðinga BT Sport sem sýndi leikinn í gærkvöldi en hann missti sig algjörlega þegar hans gömlu félagar jöfnuðu metin.

Gerrard stóð upp og barði í glerið er Hollendingurinn stangaði boltann í netið og skoraði markið sem tryggði það að Liverpool hefur ekki enn tapað innbyrðis leik á móti efstu liðum deildarinnar.

Fyrirliðinn fyrrverandi var ekki í beinni útsendingu þegar Wijnaldum skoraði en fagnaðarlæti Gerrards náðust á upptöku og settu BT-menn stutt myndbrot á Twitter-síðu sína sem má sjá hér að neðan.

Anyone wondering whether Steven Gerrard still celebrates @LFC goals? pic.twitter.com/NPxWbEnyUD

— BT Sport Football (@btsportfootball) February 1, 2017