Segir Memphis ekki hafa gert nóg til að mega klæða sig eins og trúður

Memphis Depay, fyrrverandi leikmaður Manchester United, spilaði aldrei nógu vel og skoraði ekki nógu mikið af mörkum til að geta afsakað hegðun sína og útlit utan vallar. Þetta segir Ronald De Boer, fyrrverandi landsliðsmaður Hollands.

De Boer bendir á Pierre-Emerick Aubameyang, leikmann Dortmund, í sama samhengi og segir hann vera að gera nóg innan vallar til að geta réttlætt það að klæða sig eins og trúður eins og Hollendingurinn kemst að orði.

Fatastíll Memphis vakti mikla athygli á 18 mánuðum hans á Old Trafford, eiginlega meiri athygli en frammistaðan innan vallar. Aubameyang skorar og skorar hjá Dortmund og getur því gert það sem hann vill utan vallar.

Memphis batt enda á dvöl hjá United í janúar þegar hann var keyptur til Lyon í Frakklandi. Þar byrjar hann ágætlega og er búinn að skora þrjú mörk í fyrstu sjö leikjum sínum.

„Memphis er gríðarlega hæfileikaríkur en þetta bara gekk ekki upp hjá honum,“ segir Ronald De Boer í viðtali við Sport360 um Memphis sem kom til United sem besti leikmaður hollensku úrvalsdeildarinnar.

„Hann er sérstakur karakter en stundum má hann vera aðeins skynsamari. Þegar búist er við því að þú skilir ákveðnum hlutum en þú gerir það ekki fer fólk að einbeita sér að öðru í þínu fari.“

„Ég sá til dæmis Aubameyang einu sinni í bláum jakkafötum sem voru svo ljót að hann leit út eins og trúður. Það er bara öllum sama því hann er að skora mörk. Þá er bara hlegið að svona trúðafötum.“

„Ef þú ert aftur á móti ekki að skora mörk og spila illa er meira sagt um fötin þín og fleira í þeim dúr. Menn verða að vera skynsamir og leggja meira á sig,“ segir Ronald De Boer.