Ronaldo ekki á förum frá Madrid

Portúgalinn Cristiano Ronaldo er ekki á förum frá Real Madrid, samkvæmt heimildum spænska blaðsins AS.

Fyrir tæpum mánuði gáfu portúgalskir miðlar út að Ronaldo vildi yfirgefa Evrópumeistarana eftir að hann var ákærður um skattsvik á Spáni.

Nú hefur Ronaldo hins vegar snúist hugur, ef marka má heimildir AS, og ætlar hann að halda kyrru fyrir í Madrid.

Ronaldo mætir fyrir dómstóla á Spáni 31. júlí vegna ákærumálsins.

Þessar fréttir koma á hárréttum tíma fyrir spænska stórveldið, en miðjumaðurinn James Rodriguez er sagður vilja burt frá félaginu. PSG, Manchester United og Chelsea eru öll sögð hafa áhuga á Kólumbíumanninum knáa.