Liverpool í annað sætið eftir öruggan sigur

Liverpool vann Newcastle, 2-0, eftir sannfærandi frammistöðu á Anfield í kvöld. Með sigrinum stekkur Liverpool upp í 2. sætið deildarinnar með 60 stig. Það er einu stigi meira en Manchester United sem á leik inni gegn Crystal Palace á mánudaginn.

​

Fyrsta marks leiksins kom frá Mohamed Salah á 40. mínútu eftir sendingu frá Alex Oxlade-Chamberlain. Á 55. mínútu kom Sadio Mané Liverpool í 2-0 eftir góða sendingu inn fyrir vörnina frá Roberto Firmino.

Salah skoraði í kvöld sitt 32. mark í 38 leikjum í öllum keppnum fyrir Liverpool. Til samanburðar má nefna að Newcastle hefur skorað 31 mark alls í öllum keppnum í vetur.

​

Þetta er fjórði sigur liðsins í röð í öllum keppnum en Liverpool er þó fimmtán stigum á eftir toppliði Manchester City. Staða Newcastle er öllu verri en liðið, sem leikur undir stjórn Rafael Benitez sem áður stýrði Liverpool, er tveimur stigum frá fallsæti.