María segir son þeirra hafa verið með kvef og nefrennsli. Hún hafi ekki haft miklar áhyggjur til að byrja með. Svo hafi hann fengið slímkenndan hósta sem hún hafi talið eðlilegan fylgifisk kvefsins. Til að vera öruggu megin hafi þau farið á Barnaspítalann og látið kíkja á hann. Ekkert hafi fundist en stroka hafi verið tekin úr nefi snáðans.
Hóstinn hafi hins vegar versnað og hann eigi erfiðara með að losa um slímið. Hann hósti mikið upp úr svefni og kasti upp allri mjólk eftir gjafir með tilheyrandi hósti og kúgast.
Ekkert fannst í lungum
Þau hafi aftur farið með drenginn í skoðun en ekkert fundist í lungum. Á þriðjudagsmorgun hafi símtalið komið og niðurstöður úr strokunni þær að barnið sé með kíghósta. Hann hafði farið í bólusetningu 11. september og þau tekið eftir kvefinu fyrst 13. september sem svo hafi aukist eins og áður er lýst. Einkenni kíghósta gera ekki endilega vart við sig fyrr en eftir nokkurn tíma svo hún telur ljóst að smitið hafi átt sér stað fyrir bólusetningu.Tilfelli kíghósta hér á landi hafa verið allt frá einu tilfelli á ári upp í nokkra tugi. Um mitt ár í fyrra höfðu átta tilfelli greinst. Vísir sendi Landlækni fyrirspurn um fjölda tilfella undanfarin ár sem sjá má hér að neðan.
Fullorðnir fari líka í endurnýjun
María segir ekki skipta öllu máli hvar sonur hennar nældi sér í kíghósta heldur sú staðreynd að einhvers staðar hafi verið einstaklingur sem ekki hefur verið bólusettur gegn kíghósta. Þar af leiðandi hafi smit komist í barnið hennar.Biðlar hún til fólks að bólusetja börn sín og endurnýja eigin bólusetningar.
María segir son sinn hafa fengið bakteríudrepandi hóstamikstúru sem komi í veg fyrir fjölgun bakteríunnar. Kíghóstinn sé enn til staðar og ómögulegt að segja hve lengi hann verði viðloðandi. Um leið og lyfið er farið að verka sé hann ekki smitberi en allir sem hafi verið í kringum fjölskylduna undanfarnar þrjár vikur þurfi að fara í tékk. Það séu sem betur fer bara nánir vinir og fjölskylda.
Fjöldi tilfella í fyrra
Þórólfur Guðnason, sóttvarnalæknir, sagði í samtali við Vísi í fyrra, þegar sjö vikna stúlka greindist með kíghósta, að varanleg vörn felist ekki í bólusetningunni. Fjöldi tilfella sveiflist á milli ára. Mest hafi verið árið 2012 þegar yfir þrjátíu manns greindust, fullorðnir og börn. Jafnframt sagði hann þátttöku í almennum bólusetningum nokkuð góð.„Það er þannig að þeir sem eru bólusettir að vörnin endist þeim ekki nema í nokkur á. Þannig að þeir geta smitast,“ sagði Þórólfur við Vísi. Hann nefndi að fullorðnir hafi því bakteríuna stundum í sér og fái lítil einkenni en smiti samt sem áður út frá sér.
Hann segir ekki algengt að ungabörn fái kíghósta. Hann nefnir að lítil börn vera viðkvæmari fyrir sjúkdómnum þar sem ónæmiskerfið þeirra sé enn að styrkjast. Hann var spurður út í hvernig læknar bregðist við þegar ungabörn komi til þeirra mögulega með kíghósta.
„Ég get ekkert sagt um það. Þetta er læknisfræðilegt mat í hvert skipti og hvernig læknar meta það er einstaklingsbundið eftir læknum en vissulega, svona lítil börn sem fá svona einkenni, þá eiga læknar að láta sér það detta í hug að þetta gæti verið kíghósti.“
Þá væri erfitt að segja til um hversu lengi bólusetningar virka. Það væri mismunandi eftir rannsóknum hvort að það séu sex, átta eða tíu ár. Síðasta bólusetning við kíghósta sé í níunda bekk. Fólk sé hvatt til að bólusetja sig fyrir kíghósta við önnur tækifæri, t.d. þegar fólk á undir höndum sér ferðalag og fer í aðrar bólusetningar líka.
