Forsætisráðherra fer fyrir sendinefnd Íslands á fundi kvennanefndar SÞ

Katrín Jakobsdóttir forsætisráðherra og aðrir norrænir ráðherrar jafnréttismála á Norðurlöndunum, afhentu Phumzile Mlambo-Ngcuka framkvæmdastjóra UN Women viljayfirlýsingu um að leggja áherslu á árangur í jafnréttismálum við innleiðingu heimsmarkmiða Sameinuðu þjóðanna. Viljayfirlýsingin var afhent við upphaf 63. fundar kvennanefndarinnar SÞ sem hófst höfðuðstöðvum samtakanna í New York í gær. Félagsleg vernd fyrir konur, aðgengi að almenningsþjónustu og uppbygging innviða sem tekur mið af þörfum kvenna og gerir þeim kleift að njóta öryggis og lífsgæða eru helstu umræðuefni fundarins.

„Jöfn staða kvenna og karla heima fyrir er forsenda jafnréttis á vinnumarkaði og það skiptir öllu máli að átta sig á samhenginu þar á milli,“ segir Katrín Jakobsdóttir forsætisráðherra og ráðherra jafnréttismála í frétt á vef Stjórnarráðsins. Hún  fer fyrir sendinefnd Íslands á fundi kvennanefndar Sameinuðu þjóðanna sem er ein fjölsóttasta ráðstefna heims. Ráðstefnuna sækir fólk hvaðanæva úr heiminum, þjóðarleiðtogar, fulltrúar frjálsra félagasamtaka, fólk úr einkageiranum, starfsfólk Sameinuðu þjóðanna og fleiri.

Á vef landsnefndar UN Women segir að nauðsynlegt sé að tryggja að í öllum samfélögum geti konur gengið óttalausar um almenningssvæði. „Það þarf að sjá til þess að konur hafi aðgang að hreinu vatni, heilbrigðisþjónustu og barnagæslu fyrir sig og börnin sín. Það þarf að tryggja þeim rétt til ellilífeyris og skjóta skjólshúsi yfir þolendur heimilisofbeldis. Þegar grunnstoðir samfélaga eru veikar og skortur er á opinberri þjónustu og félagslegum verndarkerfum kemur það helst niður á konum og stúlkum. Það þarf að taka mið af þörfum kvenna þegar stefnur eru mótaðar í málefnum sem snúa að þeirra veruleika. Þegar konur koma að samningaborðinu og öðlast rétt til að taka ákvarðanir eiga sér stað breytingar sem varða öll samfélög og þjóðir. Konur og stúlkur eru leiðandi í baráttunni fyrir kerfislegum breytingum sem mæta þörfum allra, allt frá því að endurskipuleggja almenningsgarða með öryggi og aðgang kvenna að leiðarljósi til þess að tala fyrir lagabreytingum á réttindum heimavinnandi kvenna.“

Katrín Jakobsdóttir forsætisráðherra átti fund með António Guterres aðalframkvæmdastjóra Sameinuðu þjóðanna í tengslum við kvennanefndarfund Sameinuðu þjóðanna. Á fundinum var rætt um áskoranir í jafnréttismálum og Katrín vakti sérstaklega athygli á árangri Norðurlandanna á því sviði en Ísland fer nú með formennsku í Norrænu ráðherranefndinni. Þá ræddu þau um aðgerðir í loftslagsmálum, komandi loftslagsfund í haust og mikilvægi þess að öll ríki leggi sitt af mörkum við lausn loftslagsvandans.

Ísland hefur síðastliðin tíu ár sem kunnugt er verið í efsta sæti á lista Alþjóðaefnahagsráðsins yfir ríki þar sem kynjajafnrétti mælist mest. Önnur Norðurlönd fylgja þar fast á eftir. Með viljayfirlýsingunni vilja ráðherrar Norðurlandanna hvetja önnur aðildarríki Sameinuðu þjóðanna til aukins samstarfs á alþjóðavettvangi í jafnréttismálum og innleiðingu heimsmarkmiða Sameinuðu þjóðanna. 

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.