Ronaldo tryggði Juventus sigur

Juventus er með þriggja stiga forskot á toppi ítölsku úrvalsdeildarinnar eftir 2-1 útisigur á Sampdoria í kvöld.

Meistararnir í Juventus komust yfir á 19. mínútu með marki Paulo Dybala eftir sendingu frá Alex Sandro.

Heimamenn náðu að jafna metin á 35. mínútu þegar Gianluca Caprari skoraði. Boltinn féll fyrir hann í teignum upp úr hornspyrnu og hann var ekki lengi að koma boltanum í netið.

Rétt fyrir hálfleikinn kom Cristiano Ronaldo Juventus yfir á nýjan leik með skalla eftir sendingu Sandro.

Ekkert var skorað í seinni hálfleik og því reyndist mark Ronaldo sigurmarkið.

Juventus er nú með 42 stig á toppi deildarinnar, þremur stigum meira en Inter sem á þó leik til góða.