Auðvelt hjá City sem eru komnir á toppinn

Manchester City er aftur komið á toppinn í ensku úrvalsdeildinni er liðið vann 2-0 sigur á Cardiff á heimavelli í kvöld.

Það voru ekki liðnar nema sex mínútur er Englandsmeistararnir komust yfir. Markið skoraði Kevin De Bruyne eftir stoðsendingu frá miðverðinum Aymeric Laporte.

Flestir héldu þá að flóðgáttirnar myndu opnast en City skoraði einungis eitt mark það sem eftir lifði leiksins. Það skoraði Leroy Sane á síðustu mínútu fyrri hálfleiks. Lokatölur 2-0.

Aron Einar Gunnarsson var tekinn af velli tíu mínútum fyrir leikslok en Cardiff er í fallsæti, 18. sæti. Þeir eru fimm stigum frá öruggu sæti.

City er hins vegar á toppnum með eins stigs forskot á Liverpool. Liðin eiga sex leiki eftir svo það er rafmögnuð spenna framundan í deildinni.