Reebok segir bless við CrossFit vegna rasískra ummæla framkvæmdastjórans um George Floyd

Það eru ekki aðeins Katrín Tanja Davíðsdóttir og Anníe Mist Þórisdóttir sem hafa lýst yfir miklum vonbrigðum sínum með forystu CrossFit samtakanna því langstærsti styrktaraðili CrossFit heimsleikanna er líka á útleið. Ástaðan eru rasísk ummæli um George Floyd.

Bandaríska þjóðin logar vegna slæmrar stöðu í réttindamála svartra í landinu. CrossFit samtökin blönduðu sér í réttindabaráttu svartra á þessum viðkvæmu tímum með ummælum sem voru einkar ómerkileg og miskunnalaus.

Meðferð hvítra lögreglumanna á blökkumanninum George Floyd í Minneapolis kölluðu fram hörð viðbrögð og mótmæli út um allan heim. Framkvæmdastjóri CrossFit ákvað að tjá sig um málið en varð sér og CrossFit íþróttinni til skammar.

Íþróttavöruframleiðandinn Reebok hefur verið aðalstyrktaraðili heimsleikanna í CrossFit en verður það ekki lengur. Reebok ákvað að slíta viðræðum við samtökin um framlengingu á samningi Reebok og heimsleikanna í CrossFit.Reebok segir skilið við CrossFit vegna rassískra ummæla framkvæmdastjórans um George Floyd

Greg Glassman er stofnandi og framkvæmdastjóri CrossFit samtakanna en hann hneykslaði mjög marga með svari sínu við Twitter-færslu Institute for Health Metrics and Evaluation í Bandaríkjunum.

Institute for Health Metrics and Evaluation var þar að lýsa því yfir að raismi væri sannkallað heilbrigðisvandamál. Svar Greg Glassman var hinsvegar ómerkilegt og virðingalaust: „Það er FLOYD-19,“ skrifaði Greg Glassman með vísun í kórónuveiruna COVID-19.

Greg Glassman lýsti í framhaldi yfir óánægju sinni með það að CrossFit stöðvarnar þurftu að loka í baráttunni við kórónuveiruna. Það þýddi mikið tekjutap og einhverjar stöðvar lifa það líklega ekki af. Glassman sakaði stofunina um að hafa brugðist sér og sínum í baráttunni við kórónuveiruna og þykir ekki mikil til þess koma ef hún ætlar nú að fara að blanda sér í réttindabaráttu svartra.

Katrín Tanja Davíðsdóttir var tilbúin að gagnrýna harkalega framkvæmdastjóra CrossFit samtakanna. „Ég skammast mín, er vonsvikin og reið vegna þess sem hefur verið í gangi síðustu daga hjá samtökum sem ég hef tileinkað mér, lagt svo mikið á mig fyrir og verið svo stolt af að keppa hjá,“ skrifaði Katrín Tanja Davíðsdóttir.

Reebok hefur verið aðalstyrktaraðili heimsleikanna í CrossFit í tíu ár en heimsleikarnir í haust verða síðustu Reebok leikarnir.

„Samstarf okkar og CrossFit samtakanna mun enda seinna á þessu ári. Við höfðum verið í viðræðum um nýjan samning en í kjölfarið á nýjustu uppákomum höfum við tekið þá ákvörðun að enda þetta samstarf,“ segir í yfirlýsingu frá Reebok

„Við munum samt uppfylla okkar gildandi samning út árið 2020. Við skuldum keppendum CrossFit leikanna, stuðningsfólkinu og CrossFit samfélaginu það,“ segir í yfirlýsingunni.

„Það sem breytist ekki er skuldbinding okkar og hollusta við sjálft CrossFit íþróttafólkið. Við erum þakklát fyrir þau sterku bönd sem við höfum myndað með þjálfurum, stöðvareigendum og íþróttafólki út um allan heima á síðustu tíu árum,“ segir í þessari yfirlýsingu frá Reebok.

Miðað við ástandið í heiminum þá er ljóst að svona stórir styrktaraðilar eru ekki á hverju horni og þetta gæti sett framtíð CrossFit leikanna í óvissu. Ummæli framkvæmdastjórans gera síðan allt annað en að hjálpa til við að finna nýjan samstarfsaðila.