Fyrri leik dagsins í enska boltanum er nú lokið. Aston Villa vann öruggan 3-0 sigur á nýliðum Fulham á útivelli.
Jack Gralish - fyrirliði Aston Villa - kom þeim yfir eftir aðeins fjögurra mínútna leik þegar hann fékk sendingu frá John McGinn inn fyrir vörnina og kláraði snyrtilega fram hjá Alphonse Areola í marki Fulham.
Annað mark gestanna kom rúmum tíu mínútur síðar og aftur komu Grealish og McGinn við sögu. Grealish lék boltanum inn á teig þar sem hann gaf fyrir á McGinn sem stillti boltanum einfaldlega upp fyrir Conor Hourihane sem gat ekki annað en skorað.
Fleiri urðu mörkin ekki í fyrri hálfleik en þriðja markið kom snemma í síðari hálfleik. Courihane tók þá aukaspyrnu úti vinstra megin sem rataði beint fyrir fætur miðvarðarins Tyrone Mings sem skoraði af miklu öryggi.
Staðan þar með 3-0 Villa í vil og reyndust það lokatölur leiksins. Fulham héldu að þeir hefðu minnkað muninn á 56. mínútu en það var dæmt af.
Aston Villa er með sex stig eftir tvo leiki á á meðan Fulham er enn án sitga eftir að hafa leikið þrjá.
