Gríska ríkisstjórnin einhuga um þjóðaratkvæði

Gríska ríkisstjórnin samþykkti einhuga að styðja ákvörðun George Papandreou forsætisráðherra um að halda bindandi þjóðaratkvæðagreiðslu um samkomulagið við Evrópusambandið um skuldavanda landsins.

Þetta var niðurstaðan á ríkisstjórnarfundi sem hófst síðdegis í gærdag og stóð langt fram á nótt. Ákvörðunin um þjóðaratkvæðagreiðsluna olli miklum lækkunum á hlutabréfamörkuðum í Evrópu í gærdag, Bandaríkjunum í gærkvöldi og Asíu í nótt. Búist er við áframhaldandi óróa á þessum mörkuðum á næstunni.

Þá mun næsta greiðsla Alþjóðagjaldeyrissjóðsins til Grikklands vera í uppnámi en hún átti að greiðast í þessum mánuði.