Réttarhöldin gegn Trump: Segja Trump hafa vitað í hvað stefndi

Vísuðu þau til fjölmargra tísta Trumps og annarra ummæla hans, bæði á deginum og í aðdraganda hans, og sökuðu forsetann um að leggja grunninn að ofbeldinu sem átti sér stað í þinghúsinu.

Eins og frægt er, þá brutu stuðningsmenn forsetans sér leið inn í þinghúsið eftir fjöldafund hans við Hvíta húsið og var eitt af markmiðum þeirra að stöðva formlega staðfestingu niðurstaða forsetakosninganna í nóvember og tryggja Trump völd áfram.

Auk þess að notast við ummæli Trumps sýndu sækjendur einnig fjölmörg myndbönd frá árásinni og þar á meðal myndbönd úr öryggisvélum sem ekki höfðu sést áður. Þar að auki voru birtar upptökur af talstöðvarsamskiptum lögregluþjóna og myndbönd þar sem þeir sögðu sögur sínar.

Meðal þeirra myndbanda sem höfðu ekki sést áður var myndband úr öryggismyndavél sem sýndi lögregluþjón mæta öldungadeildarþingmanninum Mitt Romney á göngum þinghússins. Lögregluþjónninn benti Romney á að fara í aðra átt, sem hann gerði.

Á meðan fór lögregluþjónninn til móts við þá sem höfðu brotist inn í þinghúsið og tókst honum að leiða hóp þeirra frá þingsalnum, þar sem margir þingmenn voru.

Romney er eini öldungadeildarþingmaður Bandaríkjanna sem greitt hefur atkvæði með því að sakfella forseta í sama flokki fyrir embættisbrot. Það gerði hann þegar Trump var ákærður fyrir að misnota vald sitt í samskiptum við forseta Úkraínu.

Í gær fóru fram umræður um það hvort það færi gegn stjórnarsrká Bandaríkjanna að rétta yfir fyrrverandi forseta. Undir lok kvöldsins greiddu sex þingmenn Repúblikanaflokksins atkvæði með Demókrötum svo réttarhöldin gátu haldið áfram.

Trump sjálfur er sagður hafa verið verulega ósáttur við frammistöðu verjenda sinna í gær.

Sjá einnig: Trump sagður mjög ó­sáttur við frammi­stöðu verj­enda sinna

Trump var ákærður fyrir embættisbrot öðru sinni þann 13. janúar, sjö dögum áður en hann lét af embætti. Hann er eini forseti Bandaríkjanna sem hefur verið ákærður fyrir embættisbrot tvisvar sinnum.

Sjá einnig: Trump ákærður fyrir embættisbrot öðru sinni

Trump er í raun ákærður fyrir að hvetja til uppreisnar og snýr ákæran sérstaklega að hlutverki forsetans í því að æsa fólk upp, sem á endanum braut sér leið inn í þinghús Bandaríkjanna þann 6. janúar, með því markmiði að stöðva formlega staðfestingu úrslita forsetakosninganna í nóvember.

Trump hélt ræðu skömmu fyrir árásina þar sem hann hvatti stuðningsmenn sína til að halda til þinghússins og koma skoðunum sínum á framfæri. Verjendur forsetans fyrrverandi hafa bent á að hann hafi ekki kallað eftir ofbeldi og á einum tímapunkti tekið fram að hann ætlaðist eftir friðsömum mótmælum.

Hann hafði þó um langt skeið haldið því ranglega fram að kosningunum hefði verið stolið af honum með umfangsmiklu kosningasvindli og í ræðunni sagði hann ekki hægt að sætta sig við það. Í lok ræðu sinnar sagði hann stuðningsmönnum sínum að sýna styrk, berjast og bjarga Bandaríkjunum.

Sækjendurnir sögðu Trump hafa verið vel meðvitaðan um hvað gæti gerst þegar hann hélt þessa ræðu sína. Það hafi jafnvel borist fregnir af því að Trump hafi verið ánægður með árásina þegar hann fylgdist með henni í sjónvarpi í Hvíta húsinu.

Þingmaðurinn Joe Neguse sagði stuðningsmenn Trumps hafa verið undirbúna fyrir árásina.

Eins og Jake Tapper, þulur CNN, bendir á í tísti sínu í kvöld. Þá var Mike Pence, varaforseti Trumps, fluttur úr þinghúsinu af lífvörðum sínum klukkan 14:26 að staðartíma í Washington DC. Tveimur mínútum áður hafði Trump tíst um að Pence hefði skort hugrekki til að neita að staðfesta niðurstöður kosninganna.

Þá hafði Pence þegar gert forsetanum ljóst að hann hefði ekki vald til að gera það sem Trump krafðist af honum.

Sjá einnig: Pence tjáði Trump að hann hefði ekki vald til að breyta úrslitunum

Skömmu eftir að Trump birti þetta tíst sýna upptökur úr þinghúsinu að múgurinn sem réðst á þinghúsið byrjaði að leita Pence. Einnig heyrðust hróp um að hengja ætti varaforsetann.

Sækjendurnir sýndu einnig myndbönd sem þar sem heyra mátti meðlimi múgsins leita að Pence og Nancy Pelosi, leiðtoga Demókrataflokksins í fulltrúadeildinni.

Stacey Plaskett sýndi þessi myndbönd og las upp úr samfélagsmiðlafærslum fólks sem var í þinghúsinu, sem fjölluðu um það að til stæði að myrða Pelosi. Sérstaklega var vísað til Facebookfærslu manns sem hafði verið meðal þeirra fyrstu sem ruddu sér leið inn á skrifstofu Pelosi.

Sá hafði skrifað um það að brjóta niður dyrnar að skrifstofu Pelosi og rífa hana í tætlur. Kallaði hann hana „Crazy Nancy“ og ítrekaði Plaskett að það hefði Trump kallað Pelosi lengi.

Þingmaðurinn Eric Swalweel birti svo myndband þar sem sýnt var hvernig ráðist var á lögregluþjón í þinhúsinu og varaði hann sérstaklega við myndbandinu.

Eins og áður hefur komið fram eru verulega litlar líkur á því að Trump verði sakfelldur af öldungadeildarþingmönnum. Margir þingmenn Repúblikanaflokksins hafa þegar lýst sig andvíga því að sakfella Trump.

Í frétt Washington Post er farið yfir ummæli þingmanna Repúblikanaflokksins varðandi forsetakosningarnar í nóvember og hefur tæpur helmingur þeirra farið með ósannindi um framkvæmd kosninganna og úrslit þeirra.

Málflutningur sækjenda stendur enn yfir, þegar þetta er skrifað, og má fylgjast með honum hér að neðan.