Anna Kristín Newton, sálfræðingur sem sérhæfir sig í barnagirnd, sagði í viðtali við Kompás síðastliðið haust að það vantaði sárlega viðvarandi úrræði fyrir þá sem eru haldnir barnagirnd. Þá hefur komið fram í alþjóðlegum rannsóknum að um 1% manna fyndu til slíkrar hneigðar. Anna Kristín taldi að þar væri langstærsti hlutinn karlmenn og því mætti áætla að tæplega tvö þúsund karlmenn á Íslandi girnist börn á kynferðislegan hátt.
Anna Kristín sagði jafnframt frá því í viðtalinu að ungir menn, niður í 18 ára aldur, hefðu þorað að hafa samband við hana eftir að hafa séð hana í fjölmiðlum - Menn sem segjast ekki hafa vitað hvert þeir gætu leitað.
Heimilisfriður, meðferðarúrræði fyrir gerendur í heimilisofbeldi, hefur verið starfrækt í þó nokkur ár og vildi Anna Kristín sjá samskonar úrræði fyrir menn með barnagirnd.
Að neðan má sjá umfjöllun Kompás um barnagirnd.
Stefnan að bjóða upp á fræðslu og meðferðarviðtöl
Nú hefur Anna Kristín komið á laggirnar hópnum Taktu skrefið, sem svar við þessari þörf. Hópurinn var stofnaður að breskri fyrirmynd. Anna Kristín segir að nú sé beðið eftir fjármagni, en hún ítrekar að einstaklingar geti samt sem áður sett sig í samband við hópinn strax.
„Í augnablikinu getum við boðið þeim sem hafa samband, milligöngu um að koma þeim í viðtöl hjá fagaðila á þessu sviði,“ segir Anna Kristín, sem á þó von á því að verkefnið verði fjármagnað fljótlega.
Sýnileg úrræði og opin umræða lykilatriði
Anna Kristín bendir á mikilvægi þess að úrræði fyrir gerendur séu sýnileg. „Þú hefur ekkert getað slegið inn á Google „Hvert leita ég ef ég hef beitt barn kynferðisofbeldi eða ef ég hef áhyggjur af hugsunum mínum?“. Taktu skrefið er sýnilegt og við vonum að einhverjir sem hafa velt þessu fyrir sér og hafa haft áhyggjur af hugsunum sínum, vilji fá aðstoð,“ segir Anna Kristín.
Þá sé einnig mikilvægt að halda umræðunni um gerendur á lofti í samfélaginu. Anna Kristín segist finna að „þegar það opnast gluggi fyrir umræðu um þetta málefni, gerendur almennt og að það sé hægt að gera eitthvað til þess að hjálpa gerendum að stoppa hegðun sína, að þá hefur mér alltaf fundist það skila einhverju.“ Það sé því mikilvægt að minna ítrekað á málefnið og þau úrræði sem standa til boða.
Stefnan að bjóða upp á sjálfshjálparefni, fræðslu og meðferðarviðtöl
Hún segir fyrsta skref hópsins vera að koma af stað heimasíðu með sjálfshjálparefni og fræðslu. Þá sé markmið hópsins að gera einstaklingum kleift að sækja sér aðstoð sérfræðinga og mæta í meðferðarviðtöl.
Til lengri tíma stefnir hópurinn þó á það að ná til ennþá breiðari hóps.
Raunverulega viljum ná til allra þeirra sem hafa einhverjar vangaveltur um kynhegðun sína og þeirra sem hafa sýnt af sér skaðlega kynhegðun eða hafa hugsanir sem trufla þau,
segir Anna Kristín.
„Við viljum gefa þeim tækifæri á því að leita sér aðstoðar ef þau eru tilbúin í það.“
Konur geta líka verið gerendur
Hópurinn er ætlaður öllum gerendum, óháð kyni. Anna Kristín segir að af þeim gerendum sem leitað hafa til hennar sé meirihlutinn karlmenn.
„Það koma þó einstaka konur og við vitum náttúrlega að konur geta líka verið gerendur.“ Hún segist vona að Taktu skrefið verði til þess að fleiri konur sjái tækifæri til þess að stíga fram og leita sér aðstoðar.
Hægt er að leita sér aðstoðar með því að senda fyrirspurn á netfangið taktuskrefid@taktuskrefid.is og frekari upplýsingar um úrræðið er að finna á heimasíðu 112.
