Sarah Jessica Parker, Cynthia Nixon og Kristin Davis eru mættar á tökustað nýrrar seríu Beðmáls í borginni, eða Sex and the City. Þær lásu í gegn um handritið að fyrsta þættinum ásamt samleikurum sínum.
Þetta kemur fram í Instagram-færslu sem Parker birti í gær. Þá var tilkynnt á Instagram-aðgangi þáttaraðarinnar, sem ber yfirskriftina And Just Like That, að Chris Noth fari áfram með hlutverk Mr. Big í þáttunum.
Þættirnir eiga að fara í loftið á þessu ári, fari allt samkvæmt áætlun.
Til stendur að framleiða nýja þáttaröð af Sex and the City. Í nýju þáttaröðinni verða tíu hálftíma langir þættir sem framleiddir eru fyrir streymisveituna HBO Max.
