Síðasti sigur Víkinga á Fylki í Árbæ í efstu deild kom í hús 11. september 1993 eða fyrir tæpum 28 árum síðan. Þá átti Vigdís Finnbogadóttir enn eftir þrjú ár sem forseti Íslands.
Víkingar unnu þar 2-1 sigur þar sem Tomasz Jaworek og Marteinn Már Guðgeirsson skoruðu mörk Víkinga í seinni hálfleik eftir að Björn Einarsson, þáverandi leikmaður Fylkis og núverandi formaður Víkings, hafði komið Fylki yfir í fyrri hálfleiknum.
Víkingar höfðu einnig unnið fyrsta leik liðanna í Árbænum fjórum árum fyrr en hafa ekki unnið á Fylkisvellinum frá því haustið 1993.
Frá þessum leik hafa liðin spilað níu sinnum í Árbænum í úrvalsdeild karla og Fylkir hefur unnið átta af þessum leikjum þar af síðustu fjóra. Eina stig Víkinga kom í jafnteflisleik sumarið 2014.
Víkingar hafa reyndar unnið útileik á móti Fylki á þessum tíma en sá leikur var ekki spilaður í Árbænum heldur í Egilshöllinni. Víkingar fögnuðu þá 3-2 sigri 9. júlí 2018.
Leikur Fylkis og Víkings hefst klukkan 19.15 í kvöld og er sýndur beint á Stöð 2 Sport. Upphitun á Stöð 2 Sport fyrir leiki kvöldsins byrjar klukkan 18.30 og Pepsi Max Stúkan er síðan strax á eftir þar sem allir leikir kvöldsins verða gerðir upp en leikur HK og KR sem og leikur Breiðabliks og ÍA eru sýndir beint á stod2.is.
- Leikir Fylkis og Víkinga í efstu deild karla í Árbænum:
- 24. september 2020: Fylkir vann 2-1
- 18. september 2019: Fylkir vann 3-1
- 28. júní 2016: Fylkir vann 1-0
- 26. júní 2015: Fylkir vann 1-0
- 10. ágúst 2014: 1-1 jafntefli
- 11. september 2011: Fylkir vann 2-1
- 9. ágúst 2007: Fylkir vann 1-0
- 10. júlí 2006: Fylkir vann 1-0
- 15. júní 2004: Fylkir vann 2-1
- 11. september 1993: Víkingur vann 2-1
- 16. ágúst 1989: Víkingur vann 2-1
Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.
