Byrjaði sem flösku­strákur á B5 en skemmtir nú fleiri milljónum manns út um allan heim

„London hentaði mér bara ekki akkúrat núna. Ég var rosa mikið bara einn og það hentar ekki TikTok efninu mínu. Ég er sjaldan einn í myndböndunum mínum, ég er alltaf með fólk með mér. Það er það sem mér finnst gaman við þetta. Ég hefði alveg getað grætt á því að taka upp myndbönd einn í London en þá er þetta bara ekkert skemmtilegt lengur,“ útskýrir Curly.

Vísir greindi frá því í september þegar Curly flutti út ásamt áhrifavaldinum Emblu Wigum og athafnamanninum Nökkva Fjalari en þau tvö ætla að búa áfram í London.

Sjá einnig: Lætur æsku­­drauminn rætast og leggur land undir fót

Curly segir þó aldrei að vita hvað framtíðin beri í skauti sér, kannski flytji hann aftur til London eftir einhvern tíma en mögulega fari hann til Los Angeles.

„Ég ætla bara að verða frægur, það er markmiðið. Að verða bullandi frægur og kannski finna ástina og svo kannski verða nógu frægur til að geta flutt til L.A. og búið þar í sól og blíðu með fullt af frægu fólki. L.A. er svona staðurinn þar sem flestar TikTok-stjörnur búa.“

„Það sem er heillandi við að vera frægur er bara að fá frítt dót og geta unnið við það sem mig langar og geta bara verið með strákunum og vinkonum allan daginn að gera hitt og þetta. Það er í rauninni bara málið sko.“

TikTok-ferillinn hófst á B5

Hann hefur nú verið í fullu starfi við að gera TikTok-myndbönd í um eitt og hálft ár og segir hann frá því hvernig ferillinn byrjaði á skemmtistaðnum B5.

„Ég byrjaði bara sem flöskustrákur á B5 en fékk svo að DJ-a þar árið 2018 og þar byrjaði þetta allt saman. Þar tók ég upp fyrsta myndbandið mitt sem fór viral.“

Eftir að Curly birti umrætt myndband fékk hann um 130 þúsund fylgjendur. Í kjölfarið ákvað hann að gefa í og einbeita sér að TikTok-ferlinum fyrir alvöru. Á þessum tíma var hann einnig í flugnámi en hætti í því um leið og hann sá möguleika á miðlinum.

„Mér fannst heldur ekkert gaman í flugnáminu en ég er samt einkaflugmaður. Ég var í atvinnuflugmanninum þegar ég hætti. Þetta var ekki alveg fyrir kallinn.“

Bílamyndböndin leynivopn

Curly er 23 ára gamall og er í dag með 1,1 milljón fylgjendur. Síðustu mánuði hefur bæst verulega í hópinn og fékk hann 300 þúsund fylgjendur á skömmum tíma eftir að hann flutti aftur heim til Íslands.

„Ég gerði nokkur viral myndbönd í röð. Eitt þeirra fékk 21 milljón áhorf,  eitt 15 milljónir, tvö fengu sex milljónir og það síðasta fékk 23 milljónir. Með öllu þessu áhorfi komu allir þessir nýju fylgjendur.“

Hann segir það oftast algjörlega ófyrirsjáanlegt hvaða myndbönd slá í gegn. Hann eigi sér hins vegar ákveðið leynivopn sem klikkar sjaldan. Það eru svokölluð „carpool“ myndbönd þar sem hann keyrir framhjá fólki, skrúfar niður rúðurnar og syngur lag í von um að þau geti botnað textann. Þau myndbönd skila honum alltaf miklu áhorfi og nýjum fylgjendum.

„Ég er að fá svona fimm þúsund fylgjendur á dag núna á meðan það er góð vertíð.“

En hvaða ráð getur Curly gefið þeim sem vilja reyna fyrir sér á TikTok?

„Að nota einhver trending sound. Það eru alltaf svona þrjú sound í hverri viku sem trenda. Ef þú vilt fara auto viral þá gætirðu alltaf gert einhvern svona hrekk, þar sem þú hrekkir til dæmis mömmu þína og dettur svo. Þetta þarf samt að vera náttúrulegt, því minna sviðsett sem það er því betra. Svo er alltaf betra að hafa annað fólk með þér. Þannig nota trending sound, finna fólk og vona það besta!

Ég myndi bara taka upp eins mikið af myndböndum og þú getur og pósta því öllu. Svo þegar eitthvað eitt virkar þá myndi ég bara hoppa á þann vagn og spamma því.“

Sjálfur talar hann aldrei íslensku í myndböndum sínum heldur sníður hann myndböndin fyrir alþjóðlegan markað. Enda eru Íslendingar aðeins um 4% af hans fylgjendum, flestir eru frá Bandaríkjunum eða Bretlandi.

„En þó þetta séu „bara“ um 40 þúsund Íslendingar sem eru að fylgja mér, þá eru kannski 100 þúsund Íslendingar sem horfa á myndböndin. Fólk þarf nefnilega ekkert að vera að fylgja þér til þess að horfa.“

Var til í að gera hvað sem er fyrir áhorf

Curly segist hafa verið mjög upptekinn af áhorfstölum og lækum til að byrja með en spáir minna í því núna. 

„En þetta er náttúrlega það sem ég fæ greitt fyrir þannig ég þarf alveg að hafa þetta á bak við eyrað. En ég er kannski ekki að selja mig jafn mikið fyrir áhorfstölur eins og ég var að gera. Í byrjun var ég bara alveg til í hvað sem er fyrir áhorf.“

Hann segist ekki taka því sérstaklega nærri sér ef myndband fær minna áhorf en hann bjóst við, en það geti verið svekkjandi ef hann hefur lagt mikla vinnu í myndbandið. Á bak við hvert „carpool“ myndband getur verið heill dagur í vinnu, þrátt fyrir að myndböndin séu ekki nema fimm mínútur.

„TikTok er bara svo grillað. Þau ákveða bara hvað hver og einn sér. Stundum legg ég kannski ótrúlega mikla vinnu í eitthvað myndband og það getur fengið fimmtán þúsund áhorf á meðan eitthvað heimskulegt myndband sem meikar engan sense getur fengið 50 milljónir. Það er eiginlega bara þannig að því heimskulegra sem efnið er því betra“

Markmiðið að gefa frá sér góða strauma

Curly segist ekki ákveða efnið sitt með miklum fyrirvara, heldur séu flest myndböndin tekin upp í skyndi. En hvernig er hefðbundinn vinnudagur hjá TikTok-stjörnu?

„Ég ákveð efnið í mesta lagi deginum áður. Ég vakna og reyni að fara í gymið fyrir hádegi. Svo tek ég upp efni fyrir sólsetur sem er klukkan þrjú þessa dagana. Eftir það fer ég svo bara eitthvað að chilla með strákunum og klippa myndbönd.“

„Ég vinn eiginlega mesta mína vinnu bara uppi í rúmi.“

Curly segist aldrei hafa fengið leið á TikTok og segir þetta alltaf vera jafn skemmtilegt. Hann sér fyrir sér að hann verði ennþá að gera myndbönd eftir fimm ár, en þá vonandi staddur í L.A. eða jafnvel Afríku þar sem hann væri til í að búa í Safari garði.

„Það sem ég elska við þetta er að ég er bara að gefa frá mér góða strauma. Þó þessi myndbönd séu oft alveg tilgangslaus, þá er mitt meginmarkmið bara að vera í stuði og senda frá mér góðar víbrur.“