Þjóðmál verður framvegis hægt að nálgast á nýrri hlaðvarpsveitu Sýnar sem ber nafnið Tal, en auk þess verður hlaðvarpið sem fyrr aðgengilegt á öllum helstu hlaðvarpsveitum og öllum aðgengilegt án endurgjalds.
Þjóðmál hóf göngu sína fyrr á árinu en í þáttunum er rætt hispurslaust um stjórnmál, efnahagsmál, menningu og annað tengt þjóðmálum. Þættirnir hafa vakið verðskuldaða athygli og gjarnan orðið uppspretta frétta á ýmsum sviðum.
Með samstarfi við Innherja verða efnistök þáttarins og umræða um stjórnmál, viðskipti og efnahagsmál efld enn frekar.
Þannig verða stjórnendur Innherja reglulegir gestir þáttarins ásamt öðrum sem starfa á vettvangi stjórnmála, í atvinnulífinu og í fjölmiðlum.
Innherji er nýr sjálfstæður áskriftarmiðill innan Vísis sem mun einkum beina kastljósinu að viðskiptalífinu, efnahagsmálum og stjórnmálum. Fyrst um sinn verður efnið endurgjaldslaust og aðgengilegt öllum á Vísi en með tímanum verður einungis hægt að nálgast Innherja gegn greiðslu. Áhersla er lögð á vandaðar fréttir, fréttaskýringar, viðtöl og hlaðvörp auk þess sem Innherja er ætlaður að vera vettvangur skoðanaskipta fólks úr atvinnulífinu og stjórnmálum.
