Jón Jónsson og GDRN með lag ársins á FM957

Það er virkilega gaman að segja frá því að íslenskt tónlistarfólk skoraði gífurlega hátt á listanum en íslensk tónlist hefur aldrei fengið jafn mikla spilun og í ár. Listinn var í heild sinni 25 lög og af þeim voru fjórtán íslensk.

Gróska í íslensku tónlistarlífi

Í ár var mikil gróska í íslensku tónlistarlífi þar sem margar öflugar plötur komu út og við hrepptum eftirminnilega fjórða sætið í Eurovision söngvakeppninni, en Daði Freyr sat einmitt í 25. sæti listans með lagið 10 Years. 

Íslensku rokkstjörnurnar í Kaleo voru með tvö lög á lista þar sem lagið þeirra Skinny skipar 22. sætið og Hey Gringo situr í því fjórtánda. Strákarnir tóku lagið Skinny eftirminnilega í beinni útsendingu frá Fagradalsfjalli þar sem eldgosið gaus í takt við hugljúfa tóna. 

Hinn dularfulli Hugo kom fram á sjónarsviðið í vor með lagið Hvíl í Friði sem náði tólfta sæti Árslistans en Hugo hefur alltaf komið fram með grímu sem felur allt andlit hans og enginn veit hver maðurinn á bak við listamanninn er í raun og veru. Það vakti þó mikla athygli að athafnakonan og samfélagsmiðla drottningin Birgitta Líf tók að sér að vera umboðsmaður þessa tónlistarmanns.

Íslensk lög í miklum meirihluta í topp tíu

Íslensku lögin tröllriðu efstu tíu sætunum en af tíu lögum voru heil átta frá íslensku tónlistarfólki. Friðrik Dór náði þremur lögum inn á Árslistann og lagið hans Segðu Mér er fjórða vinsælasta lag ársins. Hann og Herra Hnetusmjör sameinuðu einnig krafta sína í laginu Ég lofa þér því og situr það lag í níunda sæti árslistans.

Súperstjarnan Aron Can sendi frá sér plötuna ANDI, LÍF, HJARTA, SÁL síðastliðið sumar og rötuðu tvö lög frá honum inn á topp 10. Lagið Flýg upp lenti í níunda sæti og Blindar Götur í því þriðja. 

Þá var söngkonan Bríet einnig með tvö lög á lista en Rólegur kúreki var í áttunda sæti og náði þetta sögulega lag gríðarlegum árangri annað árið í röð. Bríet hélt einnig risastóra útgáfutónleika á plötunni Kveðja, Bríet í október síðastliðnum. Þar gerði hún sér lítið fyrir og seldi upp í Eldborg þannig að tónleikarnir urðu tvennir. 

DJ Muscleboy og Manswess skipuðu fimmta sætið með lagið Dangerous Love og Birnir og Páll Óskar sátu í öðru sæti með lagið Spurningar.

Samdi lagið eftir einlægt spjall við eiginkonu sína

Rúsínan í pylsuendanum var svo lagið Ef ástin er hrein sem er vinsælasta lag ársins 2021 á FM957. Lagið kom út í ársbyrjun og er flutt óaðfinnanlega af þeim Jóni Jónssyni og Guðrúnu Ýr Eyfjörð, betur þekkt sem GDRN. 

Þessi einlæga og kraftmikla ballaða náði til fjölbreytts hóps hlustenda og margra kynslóða þar sem fáir geta ekki raulað með grípandi viðlaginu. Undirrituð heyrði í Jóni Jónssyni og Guðrúnu Ýr og fékk að heyra hvernig lag ársins 2021 varð að veruleika.

„Ef ástin er hrein var fyrsta lagið sem ég samdi á píanóið sem keypti í desember 2018. Við Hafdís, konan mín, höfðum verið að ræða málin og létta á okkur hvað mætti betur fara hjá hvort öðru,“ 

segir Jón og bætir við: „Léttari í hjartanu kom til mín línan Þú falsar ekki kærleikann, hann endurspeglar sannleikann og viðlagslínan Ef ástin er hrein ratar hamingjan heim.“ Ári síðar fékk hann Einar Lövdahl vin sinn til að klára textann með sér og datt síðar í hug að fá GDRN með sér í dúett. „Í ársbyrjun 2020 spilaði ég lagið fyrir Guðrúnu og hún var strax til í að syngja það með mér. Ári eftir það það kom lagið svo loksins út fallega innpakkað í útsetningunni hans Pálma Ragnars.“

Guðrún Ýr Eyfjörð eða GDRN hefur með sanni átt gæfuríkt ár og sló meðal annars í gegn í Netflix seríunni Katla. Þessi hæfileikaríka listakona er þekkt fyrir einstaka rödd sína og segir alltaf skemmtilegt að fá að vinna í og flytja falleg lög. 

„Svo skemmir ekki fyrir að það er svo hrikalega skemmtilegt að flytja þetta lag með Jóni og ég er því svo þakklát fyrir alla spilunina því þá fáum við fleiri tækifæri til að syngja það fyrir ykkur öll,“

segir söngkonan GDRN um þetta gjöfula samstarf sem leiddi til vinsælasta lags ársins.

Við hjá FM957 óskum Jóni Jónssyni og Guðrúnu Ýr innilega til hamingju sem og íslensku tónlistarfólki yfir höfuð og þökkum fyrir liðið ár. Það verður spennandi að fara inn í glænýtt tónlistar ár með svona mikið af hæfileikaríku og áhugaverðu tónlistarfólki og við hlökkum til að halda áfram að styðja þétt við bakið á íslensku tónlistarlífi. Við minnum svo á íslenska listann sem heldur áfram hvern einasta laugardag á nýju ári. 

Hér má finna listann í heild sinni:

Árslistinn á Spotify: