Hildur segir í aðsendri grein á Innherja í morgun að frumvarpið sé skref í frelsisátt. „En felur líka í sér mikilvægar breytingar í jafnræðisátt, bæði til að jafna hlut innlendra framleiðenda á við erlenda sem og jafnræði fólks til að nálgast vöruna. Með frumvarpinu yrði einnig undirstrikað lögmæti innlendrar netverslunar sem hefur verið óvissu háð,” segir Hildur.
Vilja jafna stöðu innlendrar og erlendrar verslunar
Í lögum er ekki fjallað um viðskipti almennings með áfengi við erlendar verslanir, til dæmis í gegnum vefverslanir, segir í frumvarpinu. Ekki sé óheimilt að almenningur kaupi áfengi í útlöndum og flytji til landsins til einkaneyslu. Aftur á móti hafi óvissa ríkt um hvort heimilt sé að starfrækja sambærilega vefverslun hér á landi sökum einkaleyfis Áfengis- og tóbaksverslunar ríkisins á smásölu áfengis.
Frumvarpinu er ætlað að jafna stöðu innlendrar og erlendrar verslunar að þessu leyti og undirstrika lögmæti innlendrar netverslunar með áfengi. Meðflutningsmenn Hildar eru þingmennirnir Óli Björn Kárason, Bryndís Haraldsdóttir, Vilhjálmur Árnason og Berglind Ósk Guðmundsdóttir. Öll eru þau úr Sjálfstæðisflokki.
„Netverslun með áfengi hefur verið leyfileg um langt skeið í formi heimildar Íslendinga til að kaupa áfengi erlendis frá. Þetta fyrirkomulag hefur þýtt að fólk hefur getað pantað sér bandarískan bjór heim að dyrum frá erlendum netverslunum vandkvæðalaust, en ekki innlendum.
Íslenska bjórinn er bannað að selja annars staðar en í áfengisverslunum ríkisins - nema hann sé fluttur fyrst út svo hægt sé að panta hann erlendis frá. Um þann punkt ríkir í öllu falli óásættanleg lagaleg óvissa sem verður að skýra,” segir Hildur enn fremur í greininni og undirstrikar þannig augljósan aðstöðumun milli erlendra framleiðenda og íslenskra brugghúsa.
„Og er auðvitað leikhús einhvers konar fáránleika sem erfitt að gera sér í hugarlund að hafi gerst vísvitandi,” segir Hildur.
Og er auðvitað leikhús einhvers konar fáránleika sem erfitt að gera sér í hugarlund að hafi gerst vísvitandi
Engum greiði gerður með því að erlendar netverslanir fái að eiga sviðið
Í greininni kemur enn fremur fram að íslensk bjór- og vínframleiðsla sé búgrein sem hafi eflst mjög síðustu ár.
„Ekki síst vegna ástríðu og áhuga þeirra sem að standa þrátt fyrir stöðugt stapp við reglugerðir og hömlur sem takmarka möguleika þeirra til að selja sínar ágætu vörur. Við þetta bætist svo sú augljósa staðreynd að það er engum á Íslandi sérstakur greiði gerður með því að erlendar netverslanir njóti reksturs og atvinnusköpunar og borgi skatta í öðrum ríkjum frekar en á Íslandi.”
Hún segir frumvarpið fela í sér stóraukið jafnræði þeim til handa sem ekki geti eltst við það sem hún kallar útibúastefnu Vínbúðarinnar.
„Frumvarpið er landsbyggðarmál fyrir þau sem þurfa að aka tugi kílómetra til að komast í vínbúð. Það snýst um sjálfbærni hverfa fyrir þau sem ekki eiga bíla og þurfa að sækja áfengið í bílastæðabúðir sem komið er fyrir í útjöðrum hverfa og bæja. Það er réttindamál fyrir öll þau sem ekki eiga heimangengt til dæmis vegna veikinda eða fötlunar en geta pantað langflestar aðrar vörur á netinu,” segir Hildur.
